QUBA HADİSƏLƏRİ: GÜNAH DEVRİLƏN BAŞÇIDA OLUB?
5-10-2012, 08:43
ZİYA MƏMMƏDOVUN QUBA OLAYLARININ KÖRÜKLƏNMƏSİNDƏ ROLU VARMI?
DİA.AZ: - Qubada baş verən 1 Mart olaylarının üstündən xeyli müddət keçməsinə baxmayaraq hələ də cəmiyyət həmin olaylarla bağlı dolğun bilgilərə malik deyil. Bu səbəbdən DİA.AZ olaraq həmin mübhəm hadisələrin canlı şahidi olan və həmin hadisələrə görə bir neçə gün "bandotdel"də saxlanılan juralist Cəmil Məmmədlinin öz bloqunda yerləşdirdiyi “Quba hadisələri- hər şey olduğu kimi…” başlıqlı yazının ikinci hissəsini də diqqətinizə çatdırmaq qərarını verdik.
“(əvvəli birinci yazıda) - BİRİNCİ YAZIYA BURA TIKLA VƏ BAX
Apardığım araşdırmalar zamanı məlum oldu ki, həmin gün Heydər Əliyev Mərkəzində keçirilən tədbirdə əsas müzakirə mövzusu dini durum olub.
Həmin tədbirdə isə Rauf Həbibov demək olar ki, az qala radikal müxalifət kimi çıxış edib. Beləki, Rauf Həbibov rayondakı dini durumu təhlil edərək özünün məlumatı olduğu halda digər strukturların bu barədə heç birinin dolğun informasiyasının olmamasını kəskin pisləyib. Əslində Rauf Həbibovun bu məslələrdə haqlı olduğu bir neçə maraqlı məqam var idi.
1) Quba rayonunun Vladimirovka kəndində bir nəfər öz adına həyətyanı torpaq sahəsi alaraq, yerində dini mədrəsə inşa etdirmiş, hətta bu niyyətlə xarici ölkələrin birindən lazımi mebel və yataq dəstləri də sifariş edərək gətirdiyi aşkar bir olay idi. Bütün bunlar rayon güc strukturlarının hamının gözü qarşısında baş versə də, heç kəs bunu Rauf Həbibova məruzə etməmişdi. Yalnız sonradan hansısa yolla bundan xəbər tutan icra başçısı da buna görə rayonun güc strukturlarını haqlı olaraq tənqid etmişdi.
2) Quba rayonunun imkanlı adamlarının olduğu halda rayonun Amsar kəndindəki məscidin (bu gün də heç kimə məlum olmayan) adamlar tərəfindən təmir olunması ( yerli əhali təmirə maliyyə ayıran adamların qeyri-dini sektanın nümayəndələri olduğunu bildirirdilər) ona çox pis təsir etmişdi.
3) Üstəlik İslam partiyasının həbs olunan bir neçə üzvünün qubalı olması və qəbiristanlığın bələdiyyə, əslən qubalı olan Elxan Əliyev tərəfindən özündən xəbərsiz satılması onu bərk əsəbləşdirmişdi.
4) Elxan Əliyev artıq bütün bazar əhlinə bazarın Ziya Məmmədovun adamları tərəfindən ondan tələb olunduğunu və belə olacağı halda hamının bazardal qovularaq bazarın ləğv olunacağını çatdırmışdı. Sözsüz ki, burada alver etməklə ailəsini saxlamağa çalışan bir sıra qubalılar da buna etiraz edirdilər. Ancaq etiraz dalğası hələ bazardan kənara çıxmamışdı. Rauf Həbibov da bunları gözəl bilirdi, situasiyadan tam məlumatlı idi. Başqa sözlə desək, “iki qoçun başı bir qazana artıq yerləşmirdi”
Bütün bu faktları bir yerə toplayan Rauf Həbibov növbəsi çatanda çıxış edir və…
Həddən artıq emosional və aqressiv çıxış edən başçı sonradan sözlərinin hər yerdə rolikə çevriləcəyindən, internetə yüklənilərək dil-dilə düşəcəyindən təbii ki, xəbərsiz olaraq danışır. Öncə birbaşa rayon rəhbərliyinə aid olan məsələlərdə prokurordan tutmuş, təhlükəsizlik orqanlarına kimi hamıya xəbərdalıq edir.
“Bu boyda rayonu kişi (prezidenti nəzərdə tutur- C.M) bizə etibar edib. Niyə sizin heç nədən xəbəriniz yoxdu” deyə orqanları yuxarıda sadaladığım detallardan xəbərsiz olduqlarına görə bərk qınayır. Bundan sonra Qubanın sosial vəziyyətini təsvir edən başçı küçələrin bərbad olmasının səbəblərinə də toxunur. Birbaşa şəhər bələdiyyəsini hədəfə alan cümlələr zalda hətta istehzalı gülüş də doğurur.
“Məndən küçələri soruşursuz, deyim də…Qubanın küçələri, səkiləri, hər yeri artıq satılıb. Namərdcəsinə satılıb. Bunu məndən eşitmək istəyirdiniz? Ancaq bütün bunlar hamısı araşdırılacaq və tədbir görüləcək” deyə başçı çıxışını yekunlaşdırmaq istəyir.
“Quba çox yağlı bir yerdir.Hər adam istəyir ki, burda görsənsin.Özünə qarşı müsbət rəy qazansın. Elələri var, əməlləriynən, gördüyü işləriynən, yaxşı əməlləriynən. Eləsidə var ki, nankor əməlləriynən. Qubanı qubalılar satıblar biləsiz. Qubanı qubalılar 30-40 manat bazarlığa satıblar. Necə ki, bu gün də onların evinə gəlir həmin bazarlıq.30-40 manata satılıb Quba. Qubalılar tərəfindən…müəyyən nankor qubalılar tərəfindən satılıb. Quranda belə bir ayə var ki, deyir ki, namaz qılanda həm soluva, həm sağıva bax ki, bax gör yanındakılar kimdi…Sizdə bir soluvuza, sağıvıza baxın, görün hansı insanlarla bir yerdə oturursuz?! Baxın görün, qubalılar həm öz xalqın satıb, həm öz dövlətini satıb, həm öz torpağın satıb, həm öz ailəsini satıb, gedib müəyyən qruplara qoşulur, ağzına gələni danışır, nə var, nə var, onun evinə 30-40 manatlıq bazarlıq gəlsin”
Zalın böyük bir hissəsi bu sözlərin kimlərə və niyə deyildiyini əslində əzbər bilirdi. Ona görə də heç kəs yerindən tərpənməmişdi. Təkcə şəhər bələdiyyəsi Elxan Əliyev başçının bu sözlərinə etiraz əlaməti olaraq iclası tərk etmiş, bir də bir dənə qadın yerindən qalxıb “Qubalıların namusu və qeyrəti bütün dünyaya məlumdur. Bizim Fətəli xanımız, Tuti Bikəmiz olub.” deyə etiraz etmişdi.
Maraqlıdır ki, Rauf Həbibov da öz çıxışında el diliylə desək “barıtı bir az çox elədiyinin” fərqindəydi. Buna görə də elə həmin iclasda ikən bütün jurnalistlərdən çəkilmiş kadrlar götürüldü.
Rayon rəhbərliyinin heç bir tədbirinə dəvət olunmadığım üçün heç bir reportaj hazırlamasam da, bu tədbirdə iştirak edənlərlə apardığım söhbətlərdən sonra bircə yazı yazdım. PİA.AZ saytında elə həmin ayda bir yazı dərc olundu. Materialın məzmunu ondan ibarət idi ki, rayonun prokuroru Nazim Hacıyev mənz həmin iclasda çıxış edərək belə bir ifadə işlətmişdi: “İmkanım olsaydı, əlimə avtomat alıb, vəhabiləri bir-bir güllələyərdim” Həqiqətən də böyük bir rayonun prokurorunun dilindən bu cür düşünülməmiş kəlmələrin çıxması adi bir xəbər deyildi. Hər halda mən belə hesab etmişdim.
Rauf Həbibovun çıxışını isə heç də ictimailəşdirmək istəmirdim. Bunun üçün də mənim bir neçə səbəbim var idi.
1) Şəhər bələdiyyəsi Elxan Əliyevlə rayonun icra başçısı Rauf Həbibovun arasında gedən mübarizədə alət olmaq istəmirdim.
2) Rauf Həbibovun o sözləri konkret kimin ünvanına dediyini bütün iclas iştirakçıları bilirdi və o iclasda iştirak edən heç kəs ona etiraz etməmişdi.
3) Ümumiyyətlə hər hansı bir materialı araşdırarkən qərəzli olmamağa, obyektiv bir yazıya üstünlük verirəm. Bu söhbətdən isə həqiqətən də “qan” iyi gəldiyini hiss etmişdim.
Hələ heç kəs bilmirdi ki, bu adıçəkilən çıxış bir neçə ay sonra saytlarda, sosial şəbəkələrdə “reklam” olunacaq…..
( ardı var….)
Geri qayıt