Burda işçinin qara qəpik qədərində DƏYƏRİ YOXDUR

Netçala rayonu, Xınlı kənd sakini İbrahimov Murad Seyfulla oğlu tərəfindən şikayət daxil olub. "DİA-AZ"ın məlumatına görə, şikayətçi bildirir ki, “Archico” MMC şirkəti ona qarşı haqsızlıq edir:

“Mən, İbrahimov Murad Seyfulla oğlu, yazaraq bildirirəm ki, “Archico” DSX Sanqaçal layihəsində 5 ay işləmişəm. 5 ay sonra səhhətimdə ciddi problemlər olduğu üçün bulleten götürmüşəm. 2 aydır müalicə alıram. Hazırda vərəm xəstəliyindən əziyyət çəkirəm.

2 ay ərzində şirkət mənim kartıma 74 manat, bir dəfə isə 11 manat pul köçürüb. Özlərindən soruşduğum zaman isə deyirlər ki, əmək stajın az olduğu üçün belə olmalıdır.

Xəstəliyim olduğu üçün işdən uzaqlaşmaq məcburiyyətində qalmışam. Bu da mənə verilən dəyər. Şirkətdən deyirlər ki, hara istəyirsən şikayət et, sənə düşən budur".

"DİA-AZ" xatırladır ki, bütün bunlar “Archico” MMC şirkətinin ayağında olan ilk hadisə deyil ki, işçi haqqı heçə sayılır. Burada durum elədir ki, bəzən rəhbərliyin özbaşınalığı və səriştəsizliyi işçi ölümünə də səbəb ola bilir.

Məsələn, keçən ilin yanvarında Sumqayıt şəhəri ərazisində "Archico” MMC-də fəhlə işləyən 1977-ci il təvəllüdlü Nazim Bağırov kanalizasiya xətti çəkilişi zamanı torpaq uçqunu altında qalaraq ölüb.

"DİA-AZ" vurğulayır ki, hətta bu da "Archico” MMC-nin işçilərinin ölümünə səbəb olan ilk hadisə deyil.

Daha əvvəl "Archico” MMC-nin əməkdaşı Ceyhun Paşayev Yasamal rayonu, Moskva prospekti ev 75A, mənzil 30 ünvanında elektrik xəttində təmir işləri görən zaman elektrik cərəyanı vurması nəticəsində ölüb.

Məlumat üçün bildirək ki, "Archico” MMC 50 manat nizamnamə kapitalı ilə 2010-cu ildə təsis olunub. MMC-nin qanuni təmsilçisi Musayev Cavid Musa oğludur. Şirkətin hüquqi ünvanı "Bakı şəhəri, Nərimanov rayonu, Yusif Vəzir Çəmənzəminli ev 14A”da yerləşir. Şirkətin təsisçisi Məhəmməd Musayevdir.

"Archico” MMC həmçinin dövlət qurumlarının dəyəri milyonlarla manat olan çoxsaylı layihələrinin icraçısıdır. Şirkət hazırda Şuşa şəhərində yaşayış binaların tikintisi ilə də məşğuldur.

"Archico” MMC 2022-ci ildə "Azərsu” ASC-nin Novxanı və Saray qəsəbələrinin bir hissəsinin su təchizatı və kanalizasiya sistemlərinin yenidən qurulması ilə bağlı keçirdiyi 9,4 milyon manatlıq tender müsabiqəsində qalib olub. Tender müsabiqəsinin icrası 2025-ci ilin sonuna kimi davam edəcək.