Rusiya azərbaycanlıları adından sensasion çağırış

Rusiya Dövlət Dumasına keçiriləcək seçkilər yaxınlaşdıqca ölkənin siyasi arenasında müxtəlif seçki gedişləri diqqət çəkməyə başlayıb. Bu dəfə diqqət mərkəzinə azərbaycanlı seçicilərə edilən gözlənilməz çağırış düşüb.
Musavat.com Rusiyanın “Svobodnaya Pressa” nəşrinə istinadən xəbər verir ki, özünü “Rusiyanın azərbaycanlı diasporunun Telegram-kanalı” kimi təqdim edən resurs Rusiyada yaşayan etnik azərbaycanlıları Liberal Demokrat Partiyasına (LDPR) və şəxsən partiyanın lideri Leonid Sluçkiyə səs verməyə çağırıb. Nəşrin məlumatına əsasən, çağırışda Sluçki “Bakının böyük dostu”, Azərbaycan ordusunu və Prezident İlham Əliyevi dəstəkləyən siyasətçi” kimi təqdim olunur. Çağırışın diqqətçəkən tərəflərindən biri Sluçkinin LDPR-nin mərhum lideri Vladimir Jirinovskidən fərqləndirilməsidir. Müəlliflər Jirinovskinin Azərbaycana qarşı sərt və ksenofob mövqeyini xatırladaraq, Sluçkinin siyasətinin tamamilə fərqli olduğunu vurğulayırlar.
Son illərdə Sluçkinin Azərbaycanla bağlı müsbət açıqlamaları həqiqətən də geniş yayılıb. Onun əvvəlki çıxışlarında Azərbaycanı “ürəyində” daşıdığını bildirməsi, Qarabağla bağlı mövqeyi və Azərbaycan-Rusiya münasibətlərini strateji tərəfdaşlıq çərçivəsində qiymətləndirməsi diqqət çəkib. 2026-cı ilin iyulunda da Sluçki Moskva ilə Bakı arasında uzun illər ərzində formalaşmış tərəfdaşlıq münasibətlərindən danışıb. Maraqlıdır ki, bu mövqe LDPR-nin ənənəvi siyasi ritorikası ilə müəyyən ziddiyyət təşkil edir. Partiya uzun müddət miqrasiya siyasətinin sərtləşdirilməsi, Rusiyada rusların hüquqlarının müdafiəsi və postsovet məkanından gələn miqrasiya üzərində nəzarətin artırılması kimi məsələləri ön plana çıxarıb. Məhz bu ziddiyyət “Svobodnaya Pressa”nın danışdığı politoloq Vadim Truxaçev tərəfindən də xüsusi qeyd olunur. Onun fikrincə, Sluçkinin Azərbaycana yaxın mövqeyi yeni siyasi reallıqla bağlı ola bilər. Politoloq hesab edir ki, LDPR daxilində bu münasibətə müəyyən narazılıq olsa da, Sluçki Rusiya hakimiyyət strukturları ilə əlaqəli siyasi fiqur kimi təqdim olunur.
Truxaçev həmçinin Sluçkinin Azərbaycanla münasibətlərində şəxsi əlaqələrin də rol oynaya biləcəyini iddia edir. Politoloq bu kontekstdə Rusiyada fəaliyyət göstərən azərbaycanlı iş adamı Qod Nisanovun adını çəkir. Digər tərəfdən, nəşrin danışdığı Moskva hökuməti yanında Millətlərarası Əlaqələr Şurasının komissiya sədri Yuri Moskovski “azərbaycanlı diasporu” adından yayılan çağırışa ehtiyatlı yanaşıb. Onun sözlərinə görə, Rusiyada Azərbaycanın vahid rəsmi diaspor təşkilatı yoxdur və Azərbaycan milli-mədəni muxtariyyətindən LDPR-yə və Sluçkiyə səs vermək barədə belə bir çağırış gəlməyib. Bu məqam xüsusilə vacibdir: hazırkı məlumatlara görə, çağırışın məhz bütün Azərbaycan diasporunun rəsmi mövqeyi olması ayrıca təsdiqlənməyib. Eyni zamanda, LDPR-nin öz siyasi nümayəndələri və bəzi Telegram resursları həmin çağırışı Azərbaycan diasporunun dəstəyi kimi təqdim ediblər. Sluçkinin özü isə 2026-cı il Dövlət Duması seçkilərində LDPR-nin federal siyahısına rəhbərlik edir. Beləliklə, Rusiya seçkiləri ərəfəsində azərbaycanlı seçicilərin LDPR və Sluçkiyə yönləndirilməsi cəhdi siyasi baxımdan diqqətçəkən hadisəyə çevrilib. Bir tərəfdən, bu, LDPR-nin Azərbaycan icmasının elektoratına çıxış əldə etmək cəhdi kimi qiymətləndirilə bilər. Digər tərəfdən isə Sluçkinin Azərbaycanla bağlı müsbət mövqeyinin partiyanın ənənəvi millətçi və miqrasiya əleyhinə ritorikası ilə necə uzlaşacağı sual doğurur. Politoloq Vadim Truxaçevin qənaətinə görə, Azərbaycan diasporunun dəstəyi Sluçkiyə müəyyən əlavə elektorat gətirə bilər, lakin bunun LDPR-nin ümumi seçki nəticəsinə həlledici təsir göstərməsi real görünmür. Yuri Moskovskinin yanaşması isə daha fərqlidir: onun fikrincə, seçki ərəfəsində internetdə yayılan bu cür çağırışlar siyasi mübarizənin getdikcə daha qeyri-adi formalar almasının göstəricisidir.

Sonda qısaca olaraq onu qeyd edək ki, bu çağırış Rusiyada Azərbaycan diasporuna münasibətlərin kifayət qədər həssas olduğu bir vaxtda yayılıb. Xüsusilə son olaraq Moskvadakı Azərbaycan diasporasının rəhbərinin Rusiyadan deportasiya edilməsi fonunda azərbaycanlılara LDPR lideri Leonid Sluçkiyə səs vermək çağırışı diqqət çəkir...