Elmin bağbanı AĞAC SULAYAN dəyərində...

"Bağda ağacları sulayırdım. İşim uzun idi. Amma mağazadan alacaqlarım da var idi. Mağaza 300-400 metrlik məsafədə olduğundan vaxt itirməmək üçün oraya elə iş geyimində yollandım..." "DİA-AZ" xəbər verir ki, bunu özünün sosial şəbəkə hesabında Azərbaycanda İndoneziya dili üzrə ilk mütəxəssis, tanınmış filologiya elmləri doktoru və professor Həbib Zərbəliyev qeyd edib.

O daha sonra başına gələnləri belə nəql edir: "Yolda arxadan gələn bahalı bir maşın mənə çatdıqda saxladı və başını pəncərədən çıxarıb soruşdu: “Burada işləyirsən?”. “- Hə, bağ sulayırdım”, - dedim. “Ayda 400 manata mənə bağbanlıq edərsən?” - deyə yenə soruşdu. Gülümsünərək “Bir professora bağbanlıq etdirməyə ayda 400 manat az deyilmi? - dedim. O, bir anlıq duruxdu. Sonra heç nə demədən maşınını sürüb getdi. Mən də niyə bizdə insana geyiminə görə giymət vermək ənənəsinin hələ də qaldığını düşünə-düşünə yoluma davam etdim. O bahalı maşın sahibinin dediklərinə isə heç də təəccüblənmədim, çünki dövlətimin öz professorlarına verdiyi qiymət bundan o qədər də fərqlənmir..."