Sərnişinlər marşrut çatışmazlığından şikayətçidir

Bakı metrosunun "28 May" - "Nizami" keçid sahəsində aparılan yenidənqurma işləri şəhərin nəqliyyat sistemindəki struktur problemlərini daha aydın üzə çıxarıb.

Yeraltı nəqliyyatın bu strateji qovşağında yükün artması və ya hərəkətin məhdudlaşması gündəlik minlərlə sərnişini yerüstü nəqliyyatdan istifadə etməyə məcbur edir. Bu vəziyyət paytaxtın avtobus şəbəkəsinin hazırkı sərnişin axınını qarşılamaqda çətinlik çəkdiyini və xüsusilə müəyyən istiqamətlərdə ciddi marşrut çatışmazlığının olduğunu göstərir.

"Yeni Sabah"ın araşdırmasına görə, yerüstü nəqliyyatda ən böyük gərginlik metronun alternativsiz qalan oxlarında – şəhərin şərq və qərb hissələrini bir-birinə bağlayan marşrutlarda müşahidə olunur. Əhmədli, Günəşli, Xətai və Hövsan istiqamətindən gələn sərnişinlərin Yasamal, "Elmlər Akademiyası", "İnşaatçılar" və Mətbuat prospekti zonasına rahat çatması üçün mərkəzdən yan keçən tutumlu, sürətli və ya ekspress xətlər kifayət qədər deyil. 

Sərnişinlər məcburi olaraq "28 May" və Cəfər Cabbarlı meydanı ətrafındakı sıxlığa daxil olurlar ki, bu da həm vaxt itkisinə, həm də mərkəzi küçələrdə əlavə nəqliyyat yükünə səbəb olur. Ziya Bünyadov prospekti boyunca "Koroğlu" stansiyasından "20 Yanvar" istiqamətinə hərəkət edən kəsən (diaqonal) marşrutların sayca azlığı və intervalsızlığı da qərb-şərq koridorundakı yükü artırır.

Bununla yanaşı, şəhərdaxili əlaqələrdə ən ciddi avtobus çatışmazlığı və hərəkət problemi "Nərimanov" və "Azadlıq Prospekti" metro stansiyaları arasında özünü göstərir. Bu iki iri nəqliyyat qovşağı Atatürk prospekti və Ziya Bünyadov kəsişməsi vasitəsilə sıx məskunlaşmış yaşayış massivlərini biznes və təhsil mərkəzləri ilə bağlayan strateji koridordur. Lakin bu istiqamətdə birbaşa və tutumlu avtobus xətlərinin kəskin azlığı sərnişinləri çarəsiz qoyur.

Mövcud azsaylı marşrutlar məhəlləiçi küçələrə daxil olaraq yolu uzadır, pik saatlarda interval 20-30 dəqiqəyə çatır və nəticədə dayanacaqlarda böyük sıxlıq yaranır. Sərnişinlər ya iki nəqliyyat vasitəsi dəyişməli, ya metrodan istifadə edərək "28 May" stansiyasında dolanbac keçid etməli, ya da qanunsuz taksi xidmətlərinə yönəlməli olurlar.

Paytaxt ətrafı qəsəbələr və peyk yaşayış məntəqələri üzrə çatışmazlıq isə daha qabarıq görünür. Xüsusilə, əhalinin sürətlə məskunlaşdığı Masazır, Xırdalan, Saray, Binəqədi və Mehdiabad istiqamətlərindən şəhər mərkəzinə və ya yaxın metro stansiyalarına ("Memar Əcəmi", "Avtovağzal") yönələn marşrutlarda ciddi sıxlıq var. Oxşar vəziyyət Abşeronun şərq qəsəbələrində: Maştağa, Mərdəkan, Zabrat, Ramana və Suraxanı istiqamətində də özünü göstərir. Bu ərazilərdən fəaliyyət göstərən avtobusların həm intervalı böyükdür, həm də onların böyük hissəsi sərnişinləri yalnız "Koroğlu" Nəqliyyat Mübadilə Mərkəzinə qədər gətirir. Nəticədə sərnişinlər şəhər mərkəzinə çatmaq üçün ikinci bir nəqliyyat vasitəsinə minməli olurlar.

Mövcud vəziyyətdən çıxış yolu kimi paytaxtda radiasiyal (mərkəzə yönəlmiş) marşrutlarla yanaşı, qəsəbələri və sıx məskunlaşma zonalarını mərkəzdən keçmədən bir-birinə bağlayan dairəvi və xətli əlaqə marşrutlarının yaradılması zəruridir. Məsələn, Hövsan – Zığ – Ağ Şəhər – Mərkəz koridoru, Bakıxanov – Ziya Bünyadov – 20 Yanvar xətti, "Azadlıq Prospekti" ilə "Nərimanov" stansiyalarını birbaşa bağlayan ekspress marşrut, eləcə də Xırdalan/Masazır zonasından doğrudan Yasamal və Mətbuat prospektinə çıxan yeni avtobus xətlərinin istifadəyə verilməsi yerüstü nəqliyyatın yükünü əhəmiyyətli dərəcədə azalda bilər. Metroda aparılan işlər fonunda belə inteqrasiya olunmuş yerüstü nəqliyyat dəhlizlərinin təşkili şəhərin ümumi mobilliyini qorumaq üçün ən vacib addımdır.