Azərbaycan və Türkiyənin birgə müəssisəsinin rəhbərliyində iki mühüm təyinat baş tutub

SOCAR və Türkiyənin TEKFEN şirkətinin Azərbaycandakı birgə müəssisəsinin rəhbərliyində bir sıra mühüm dəyişiklik baş tutub.

Banker.az xəbər verir ki, “AZFEN” MMC-nin Direktorlar Şurasının üzvləri Hakan Sadık Göral və Hakan Dündar müvafiq vəzifələrindən ayrılıblar.

Onları bu vəzifədə Erdem Şair və Serhat Pütürgeli əvəz edib.

Hazırda AZFEN-nin Direktorlar Şurası sədrlə birlikdə 5 nəfərdən ibarətdir. Onun üçü Azərbaycan, ikisi isə Türkiyə tərəfdən təmsil edilir.

“Azfen” MMC 2025-ci ili 215.8 min manat xalis mənfəətlə başa vurub. Şirkət 2024-cü ildə 25.91 mln. manat xalis zərər açıqlamışdı. “Azfen”nin müştərilərlə müqavilələrdən əldə etdiyi gəlirləri 113.1 mln. manat təşkil edib ki, bu da illik müqayisədə 50.2% çoxdur. Müqavilə xərcləri isə 112.79 mln. manata yüksələrək 14.1% artıb. Nəticədə, 2024-cü ildə 23.66 mln. manat olan ümumi zərər 2025-ci ildə 309.7 min manat ümumi mənfəətlə əvəzlənib.

Xatırladaq ki, “Azfen” MMC 1996-cı ildə Azərbaycan Respublikası Dövlət Neft Şirkəti (SOCAR) və Türkiyənin “Tekfen İnşaat ve Tesisat A.Ş.” tərəfindən birgə müəssisə kimi yaradılıb. Səhmdarlıq strukturu üzrə pay bölgüsü müvafiq olaraq 60% və 40% təşkil edir. 2025-ci ildə orta hesabla 1 417 nəfər işçisi olub. 2024-cü ildə bu göstərici 1 211 nəfər idi ki, bu da illik müqayisədə 17.0% artım deməkdir.