Bizi yarı yolda qoyan metro...

Maraqlıdır: dünyanın bir çox şəhərlərində metro xətləri elə inkişaf etdirilir ki, onları birləşdirməklə yeni əlaqələr və rahat marşrutlar, o cümlədən dairəvi xətlər yaradılsın. Bizdə, Bakıda isə əksinə, mövcud və bir-biri ilə əlaqəli xətləri ayırmaq qərarına gəliblər. Artıq sərnişin heç vaxt «Dərnəgül» stansiyasından «Həzi Aslanov» stansiyasına birbaşa, qatardan düşmədən gedə bilməyəcək – mütləq keçid etməli olacaq.

Ən təəccüblüsü isə budur: bütün saytlardan sərnişinlərin üzərinə axışan, demək olar ki, bir-birini təkrarlayan bu qədər cüzi məlumatın içində mən – metronun fəal istifadəçisi – əsas suala sadə və aydın cavab tapa bilmədim: bu nə üçün edilir? Bir ildən sonra, inşaAllah, işlər başa çatdıqdan sonra harada və necə keçid etmək lazım gələcək? Qırmızı və Yaşıl xətlərin ayrı-ayrılıqda fəaliyyət göstərməsi nəticəsində sərnişin itirdiyi birbaşa, keçidsiz gediş imkanının əvəzində konkret olaraq nə əldə edəcək? Bunun hansı üstünlükləri olacaq və hansı narahatlıqları yaradacaq?

Axı izah edin! Heç bir aydın izahat yoxdur.

Nə üçün Nəqliyyat, Rabitə və Yüksək Texnologiyalar Nazirliyinin məmurları gələcək metronun sadə və anlaşılan sxemini göstərib öz planlarını və onların üstünlüklərini insan dilində izah edə bilmirlər?

Vətəndaşların qarşısına özləri çıxıb qəbul etdikləri qərarların mahiyyətini iki kəlmə ilə aydın və məntiqli şəkildə izah etməyə belə qadir olmayan məmurların bu açıq-aşkar səriştəsizliyinə nə qədər dözmək olar?