Aİ Rusiya məhdudiyyətlərinin təsirini azaltmaq üçün Ermənistana təcili ticarət dəstəyi hazırlayır

Avropa İttifaqı Rusiyanın tətbiq etdiyi idxal məhdudiyyətlərinin təsirini kompensasiya etmək məqsədilə Ermənistana təcili ticarət dəstəyi paketi hazırlayır.

Bu barədə “Financial Times” məlumat yayıb.

Nəşrin planlarla tanış olan dörd mənbəyə istinadən verdiyi məlumata görə, Avropa Komissiyası Ermənistanın ərzaq və kənd təsərrüfatı məhsullarının ixracına tətbiq olunan gömrük rüsumlarını azaltmağı nəzərdə tutan muxtar ticarət tədbirləri üzərində işləyir.

Bildirilir ki, təşəbbüs Rusiyanın Ermənistanda keçirilən son parlament seçkiləri ərəfəsində tətbiq etdiyi idxal məhdudiyyətlərinə cavab olaraq hazırlanıb. Brüsseldə hesab edirlər ki, həmin addımlar Ermənistan hökumətinə təzyiq göstərmək məqsədi daşıyıb.

“İndi onları dəstəkləmək və etibarlı tərəfdaş olduğumuzu göstərmək vaxtıdır. Ermənistana dostlar lazımdır, bizim isə qonşuluğumuzu qorumağa ehtiyacımız var”, - deyə FT-nin həmsöhbətlərindən biri bildirib.

Məlumata görə, Aİ ölkələrinin əksəriyyətinin və Avropa Parlamentinin təsdiqini tələb edən tədbirlər Rusiyanın qadağa tətbiq etdiyi təxminən 20 məhsul kateqoriyasının əksəriyyətini əhatə edəcək. Həmin məhsulların illik dəyəri təxminən 420 milyon avro təşkil edir.

Məsələ Aİ xarici işlər nazirləri tərəfindən bu həftə Lüksemburqda Ermənistanın xarici işlər naziri ilə keçirilən görüşdə də müzakirə olunub.

Avropa Komissiyasının sözçüsü Olof Gill FT-yə bildirib ki, təklif edilən tədbirlər daha çox erməni şirkətinin Aİ bazarına çıxışını təmin etməyə və ölkə iqtisadiyyatının ən çox zərər çəkən sahələrinə dəstək verməyə yönəlib.