“PAŞA Maliyyə Holding”də rəhbər vəzifəyə təyinat olub

Asəf Hüseynov “PAŞA Maliyyə Holdinqi”ndə yeni vəzifəyə təyin edilib.

Banker.az xəbər verir ki, Asəf Hüseynov PAŞA Maliyyə Holdinqinin İdarə Heyəti sədrinin müavini, Baş Maliyyə və Risk inzibatçısı təyin edilib.

O, 5 avqust 2025-ci il tarixindən “PAŞA Bank”ın Müşahidə Şurasının üzvüdür. 2023-cü ildən “PAŞA Sığorta” ASC-nin Direktorlar Şurasının üzvüdür.

Asəf Hüseynov 2021-ci ilin mayından 2026-cı ilin mart ayına kimi “PASHA Holding”in baş risk inzibatçısı olub.

Hüseynov Bakı Dövlət Universitetində “İqtisadi kibernetika” ixtisası üzrə bakalavr təhsilini 2005-ci ildə tamamlayıb. Peşəkar fəaliyyətinə 2006-cı ildə “AccessBank Azərbaycan”da aparıcı mütəxəssis kimi başlayan Hüseynov, 2009–2015-ci illərdə Azərbaycan Respublikasının Mərkəzi Bankında çalışaraq əvvəlcə bank qrupunun mütəxəssisi, daha sonra isə bank qrupunun rəhbəri vəzifələrində fəaliyyət göstərib.

2015–2019-cu illərdə “Unibank” ASC-də İdarə Heyətinin üzvü, sədr müavini və birinci sədr müavini vəzifələrini icra etmiş, 2016–2020-ci illərdə Bakı Fond Birjasının Müşahidə Şurasının üzvü olmuşdur. 2018–2019-cu illərdə Azərbaycan Kredit Bürosunun Müşahidə Şurasının sədri kimi fəaliyyət göstərib. 2019–2021-ci illərdə “PAŞA Bank Gürcüstan”da Direktorlar Şurasının üzvü və baş risk inzibatçısı vəzifəsini icra edib.

Xatırladaq ki, 30 dekabr 2025-ci il tarixindən etibarən “PAŞA Holding”in yeni törəmə şirkəti olan “PAŞA Maliyyə Holding” fəaliyyətə başlayıb.