Putinin kriminal dəstəsindəki azərbaycanlı kimdir?

Rusiyada baş verən yaxta qəzası Türkiyədəki “Susurluq” qəzasını xatırladır. Belə ki, yaxtada dövlət adamından mafiyaya, modeldən iş adamına qədər hər kəs var.

Rus mediasında yayılan məlumatlar göstərir ki, dekabrın 20-də baş vermiş yaxta qəzası artıq sadəcə texniki hadisə kimi deyil, yüksək səviyyəli siyasi-kriminal əlaqələrin toxunduğu bir iş kimi görünür.

Qəza nəticəsində “Solntsevsk OPG”nin əsas fiqurlarından biri olan Viktor Averin həlak olub, ağır xəsarət alanlar isə sağ qalıb. Ertəsi gün Rusiya Cinayət Məcəlləsinin 263-cü maddəsi ilə cinayət işi açılsa da, proses qısa müddətdə “ilişib qalıb”. Səbəb kimi qeyri-rəsmi şəkildə istintaqa qayıqda olan şəxslərin dindirilməsinin yuxarıdan qadağan edilməsi göstərilir.

Rəsmi versiyada bildirilir ki, sükan arxasında Averin olub, yaxta qaranlıqda buz parçasına çırpılıb və sərnişinlər buzlu suya düşüblər. Averin hipotermiyadan ölüb. Lakin bu versiyanın əsaslandırılması üçün vacib olan şahid ifadələri toplanmayıb. Bu isə diqqəti istər-istəməz yaxtada olanların kimliyinə yönəldir. Siyahıdan sonradan gizlədilməyə çalışılan ən mühüm ad Viktor Xmarindir – Putinin tələbə yoldaşı və yaxın çevrəsinə daxil olan şəxs. Məhz Xmarinin varlığı istintaqın niyə dayandırıldığı sualını kəskinləşdirir.

Hadisənin həssaslığını artıran digər məqam Xmarinin qayıqda 18 yaşlı model Yekaterina Leonova ilə birlikdə olmasıdır. Sosial şəbəkələrdə yayılan izlər onların münasibətlərinin daha erkən dövrdən başladığını göstərir. Qəzanın dərhal ardından qayıqda olanların hamısı sosial şəbəkələrdən yoxa çıxıb, yalnız bir müddət sonra Leonovanın səhifəsi qısa bir video ilə “canlanıb”. Bu susqunluq fonunda istintaqın şahidlərə toxunmaması hadisənin ört-basdır edildiyi təəssüratını gücləndirir.

Bütün bunların içində isə xüsusilə diqqət çəkən bir ad var: Şəmistan Əliyev. Rus mənbələrində o, Xmarinə yaxın azərbaycanlı biznesmen kimi təqdim olunur. Açıq reyestrlər Şəmistan Əliyevin Moskva mərkəzli neft-qaz və servis sektorunda fəaliyyət göstərən şirkətlərdə rəhbər və təsisçi statusu daşıdığını, Xmarinə biznes əlaqələrinin mövcud olduğunu göstərir. Bu fakt onu təsadüfi sərnişin yox, Putinin yaxın çevrəsi və kriminal aləmlə kəsişən əlaqələr zəncirinin bir halqası kimi önə çıxarır.

Beləliklə, məsələ qayıq qəzasının necə baş verməsindən çox, kimlərin eyni qayıqda olması ilə bağlıdır. İstintaqın dondurulması, şahidlərin susdurulması və məlumatların gizlədilməsi onu göstərir ki, burada açılması arzuolunmayan əlaqələr var. Qəza arxa plana keçir, ön plana isə Putinin çevrəsi, “Solntsevsk OPG” və onlarla biznes ortaqlığı olan azərbaycanlı fiqurun adı çıxır. Əsas sual da elə budur: bu əlaqələr niyə qorunur və kimin maraqlarına toxunur?

Yenicag.az