SOCAR ayırdığı VƏSAİTİ AZALTDI...

Yeni mövsümdən “Neftçi”nin SOCAR tərəfindən ayrılan büdcəsi azaldılacaq.

"DİA-AZ"ın Publika.az-a istinadən məlumatına görə, bu barədə şirkət araşdırmalardan sonra qərar verib. Paytaxt klubunun əsas maliyyəçisi olan SOCAR əvvəlki mövsümlərin maliyyə hesabatını araşdırıb və nəticədə xoş olmayan məqamlarla üzləşib.

Xüsusilə transfer əməliyyatlarında və təzminatlara xərclənən milyonlar sponsorun diqqətini cəlb edib. Çox sayda futbolçu yüksək xərclər qarşılığında transfer edildikdən qısa müddət (təqribən 6 ay sonra) kompensasiya qarşılığında göndərilib. Bəzən bu xərclər 500 min və 1 milyon manat aralığında dəyişib. Oxşar hallar məşqçi dəyişiklikləri zamanı da yaşanıb.

Uğursuz nəticələrə rəğmən, futbolçulara ödənilən bonus və mükafatlar da SOCAR-ın diqqətini cəlb edib.

Bundan başqa, əlavə xərclərin çoxluğu, böyük büdcəyə rəğmən klubun bazasındakı təmir işlərinin yekunlaşmaması da narahatlıq doğurub. Müxtəlif əməliyyatlar üzrə bağlanan müqavilələrin bahalığı, media və digər qurumlarla əməkdaşlıq anlaşmaları zamanı məbləğlərin kifayət qədər yüksək olması nəzərdən qaçmayıb.

Bütün bu məqamları nəzərə alan SOCAR xərclərin optimallaşdırma siyasətinə uyğun olaraq “Neftçi”nin büdcəsini azaltmağa qərar verib. Bu proses mərhələli şəkildə hər mövsüm davam edəcək. Kluba hazırda hər mövsüm üçün 22 milyon manatdan bir qədər artıq məbləğ ayrılır. 4-5 il ərzində bu 5-10 milyon manata qədər azalacaq.

Bu proses barədə kluba məlumat verilib. Bildirilib ki, “Neftçi” bundan sonra özünü maliyyələşdirməyə keçməlidir. Bu mənada “Beşiktaş”dan gətirilən kadrların təcrübəsindən yararlanmaq tapşırılıb. “Ağ-qaralar”ın son zamanlarda ərəblər də daxil olmaqla bir neçə şirkətlə əməkdaşlığa can atması bu prosesin işartısıdır. Eyni zamanda “Qarabağ” nümunəsindən yararlanmaq və avrokuboklarda uğurlu çıxış edərək UEFA-dan vəsait əldə etmək də tələb olunub.

Məsələ ilə bağlı "Neftçi"nin mövqeyini öyrənməyə cəhd etdik. Amma klub bununla bağlı mövqe bildirməkdən imtina etdi.