Qanunsuz estetik əməliyyat edən “Dr Gülü” haqqında nə zaman tədbir görüləcək?

Səhiyyə Nazirliyinin tibb işçilərinin vahid reyestrində adı olmayan və özünü “Dr Gülü” kimi təqdim edən Gülbadə Abdullayeva adlı xanım yenidən qanunsuz fəaliyyətini bərpa edib.

AzFakt.com xəbər verir ki, Gülbadə Abdullayeva Binəqədi rayon 7-ci mikrarayon Bakı-Qars küçəsində (keçmiş Azərbaycan Beynəlxalq Univeristeti) ilə üzbəüz binanın altında gizli icarəyə obyekt götürərək liposaksiya bədən şəkilləndirmə əməliyyatı ilə məşğuldur. Məlumata görə Gülbadə Abdullayevanın qanunsuz fəaliyyətində şəriki Fatima adlı bir xanımdır.

Bildirək ki, Gülbadə Abdullayeva bir müddət öncə estetik əməliyyat zamanı xəstənin başının üstündə rəqsi ilə gündəmə gəlmişdi.

Səhiyyə Nazirliyinin yaydığı məlumata görə Gülbadə Əliqismət qızı Abdullayevanın adı nazirliyin tibb işçilərinin vahid reyestrində yoxdur və onun tibbi fəaliyyət göstərmək səlahiyyəti mövcud deyil.

Tibbi fəaliyyət göstərmək səlahiyyəti olmamasına baxmayaraq, Gülbadə Abdullayeva qanunları heçə sayaraq, yenidən gizli şəkildə liposaksiya bədən şəkilləndirmə əməliyyatı ilə məşğul olur. Tik-tok sosial şəbəkəsində canlı yayımlar açan Gülbadə Abdullayevanın şərikləri açıq şəkildə bədən şəkilləndirmə əməliyyatı apardıqlarını etiraf edirlər. Ümumi bədənşəkilləndirmə əməliyatının (pop transfer) 1500 manat, buxax əməliyyatının isə 250 manat qiyməti var.

Qeyd edək ki, Səhiyyə Nazirliyi Gülbadə Abdullayevanın (Dr Gülü) qanunsuz fəaliyyəti ilə bağlı Baş Prokurorluğa şikayət edib. Tibbi fəaliyyət göstərmək səlahiyyəti olmadığı üçün haqqında Baş Prokurorluğa şikayət edilən Gülbadə Abdullayeva isə qanunları tapdalayaraq özünün qanunsuz fəaliyyəti ilə məşğuldur.

Aldığımız məlumata görə Gülbadə Abdullayeva qanunsuz fəaliyyət göstərməsi üçün özünə hüquq mühafizə orqanlarında himayədar tapıb. Maraqlıdır, sabah Dr Gülü hansısa bir pasiyentə bu və ya digər şəkildə zərər versə, o zaman onun himayədarları bu saxta doktorla eyni məsuliyyəti daşımayacaqlarmı? Ümumiyyətlə saxta doktorlara himayədarlıq edənlər özlərinin mənıvi və hüquqi məsuliyyətlərindən xəbərdardırlarmı? Axı hansı yolla olursa olsun, pul qazanmaq şirin olsa da, həmişə məsuliyyətdən yayınmaq olmur. Bunu həm saxta Dr Gülü, həm də onu himayə edənlər başa düşməlidir.

İnanmaq istəyirik ki, aidiyyatı qurumlar və hüquq mühafizə orqanları tibbi fəaliyyət göstərmək səlahiyyəti olmadan vətəndaşları sosial şəbəkələr vasitəsilə aldadaraq liposaksiya bədən şəkilləndirmə əməliyyatları aparan Gülbadə Abdullayeva ilə bağlı qanuni tədbir görəcəklər.