Pekin Moskva və Tehrandan fərqli olaraq …
Bu gün, 13:07
Çinin rəqibləri onun artan hərbi gücündən narahatdır, dost və tərəfdaşları isə bu ölkə ilə iqtisadi və ticarət əməkdaşlığından, o cümlədən yatırımlarından faydalanmağa çalışırlar.
Musavat.com-un məlumatına görə, bunu politoloq Elxan Şahinoğlu bildirib. Ekspertin sözlərinə görə, sözügedən məsələdə ikincilər birincilərdən çoxdur: “Çünki, Çinlə iqtisadi əməkdaşlığın faydaları çoxdur. Azərbaycan da bu əməkdaşlıqdan faydalanmaq istəyir. Azərbaycan ərazisindən keçən və inşa olunan nəqliyyat yollarının əsas ünvanı Çindir, bu ölkədən dünya bazarlarına daşınan yüklərin bir hissəsi Mərkəzi Asiya və Cənubi Qafqazdan danışınarsa, bu artıq iştirakçı ölkələr üçün faydalıdır. Rəqəmlər də bundan xəbər verir. Orta Dəhliz və Bakı-Tbilisi-Qars dəmiryolu ilə daşınan yüklərin həcmi artmaqdadır. Azərbaycanla Çin arasında viza tətbiqi ortadan qaldırıldıqdan sonra ölkəmizə gələcək çinli turistlərin sayında da artım ehtimalı yüksəkdir”.
E.Şahinoğlu xüsusi vurğulayıb ki, Azərbaycanla Çin arasında siyasi əlaqələrdə də problem yoxdur: “Bir-birlərinin ərazi bütövlüklərini tanıyan iki ölkə daxili işlərə qarışmamaq siyasətindən çıxış edir. Çini Rusiyadan fərqləndirən də budur. Moskva qonşu dövlətlərin daxili işlərinə qarışır, onlara “yol göstərməyə” çalışır, “Qərb ölkələrindən uzaq dayanın” kimi nəsihətlər verir, ”Rus evləri” vasitəsilə təsir agentləri formalaşdırır. Əlbəttə Pekin də siyasətində “yumşaq güc”dən faydalanmağa çalışır, müxtəlif tədris mərkəzlərində “Konfutsi mərkəzləri” yaradır, Çin dilinin öyrənlməsini təşviq edir, ancaq əməkdaşlıq etdiyi dövlətə “Qərblə əməkdaşlıq etmə” kimi mesajlar göndərmir. Pekin işğal dövründə Azərbaycanın ərazi bütövlüyünü dəstəkləsə də, Ermənistanla da sıx əlaqələr qurmuşdu və bu siyasətini indi də davam etdirir. Buna iradımız yoxdur. Çin Azərbaycana və Ermənistana silah satmadı. Pekin Moskva və Tehrandan fərqli olaraq, Azərbaycan və Ermənistan liderlərinin avqustun 8-də Vaşinqtonda əldə etdiyi razılaşmanın əleyhinə də deyil. Pekin üçün əsas odur ki, Azərbaycanla Ermənistan arasında sülh olsun ki, Çin bölgədə formalaşan əməkdaşlıq imkanlardan istifadə edə bilsin”.
Geri qayıt