“Elmi işini süni intellektə yazdıranlar var”

Son zamanlar süni intellektin imkanlarından elmi sahədə sui-istifadə halları müzakirə olunur. Xüsusilə, elmi məqalələrin və dissertasiyaların süni intellekt vasitəsilə yazdırılması məsələsi alimlər və təhsil ekspertləri arasında ciddi narahatlıq doğurub. Mövzuya münasibət bildirən sabiq deputat Etibar Əliyev hesab edir ki, süni intellektin yazdığı məqalələri orijinal müəllifin işindən fərqləndirmək artıq mümkünsüzdür.

Etibar Əliyev Bizim.Media-ya açıqlamasında qeyd edib ki, artıq süni intellektin yazdığı məqalə ilə müəllifin hazırladığı məqalə arasında ciddi fərq yoxdur:

“Bu, çoxdan tətbiq olunur. Hətta tanınmış bir professor mənə dedi ki, biz süni intellektə beş məqalə mövzusu verdik və yazılanlardan birini heç bir proqram plagiat və ya AI izi olaraq tanımadı. Yəni elə bir dövr gəlib ki, süni intellektlə yazılan məqaləni adi müəllifin işindən ayırmaq olmur. Azərbaycanda isə bu, adi hala çevrilib”, - sabiq deputat bildirib.

Onun sözlərinə görə, elmi dərəcə almaq istəyənlərin bir qismi öz işi barədə danışa bilmir, çünki məqalələrini süni intellekt hazırlayıb:

“Biologiya sahəsində 18 nəfərin elmi işindən imtina olunub. Cəmiyyət bilməlidir ki, onlar kimlərdir. Çünki elmi işinin məzmununu bilməyən adamlara alimlik diplomu verilməsi elmə hörmətsizlikdir”, - deyə o əlavə edib.

Etibar Əliyev həmçinin ironiya ilə qeyd edib ki, yaxın gələcəkdə insanlara doğum şəhadətnaməsi ilə birlikdə alimlik diplomu da verilə bilər:

“Təbii intellektin yerini süni intellekt tutur. Elm adına yazılan işlərin keyfiyyəti və müəllifliyi ciddi sual altına düşüb”, - deyə sabiq deputat vurğulayıb.