“Oğlum xəstə idisə, klinikada necə video çəkirdi?”
29-01-2025, 09:57
Xəbər verdiyimiz kimi, yanvarın 21-də 37 yaşlı Ceyhun Süleymanov “Medilife” klinikasında dünyasını dəyişib.
Mərhumun anası Afayət Süleymanova Baku TV-yə açıqlamasında oğlunun həkim səhlənkarlığının qurbanı olduğunu deyib.
O bildirib ki, oğlu mədə-bağırsağını müayinə etdirməyə “Stimul” klinikasına gedib: “Təzyiqi aşağı olduğu üçün ona iynə aldırıb vurublar. Ceyhun narahatlığı olar deyə narkoz almaq istədiyini deyib. Həkim Ləman Xasıyeva isə narkoz verənin işdə olmadığını söyləyib, ona “Medlife” Hospitala getməyi tövsiyə edib. “Mən gəlib səni orada müayinə edərəm”, deyib”.
Daha sonra anası oğlu ilə telefonda danışıb. Həmin gün Ceyhun Süleymanov deyib ki, 4 dəfə bağırsağı yuyulub və özünü yaxşı hiss edir:
“Ondan sonra qaynımgilə xəbər gəlib, klinikaya gediblər. Xəstəxanada görüblər ki, oğlum otaqda uzanıb, yanında heç bir həkim yoxdur. Onunla gedən oğlan görüb ki, həkimlər qaçırlar. Nə olduğunu soruşanda deyiblər ki, ayılda bilmirik. Əməliyyatdan öncə heç bir analiz götürülməyib. Övladımın ciddi problemi yox idi, ancaq müayinəyə getmişdi. Xəstə adam da video çəkər? Otağında video çəkib, hazırlıq prosesini görüntüləyib. Evin tək oğlu idi, iki övladı da var idi”.
İddialarla bağlı yenidən klinikaya müraciət edilsə də, suallara cavab verən olmayıb. Xəstəxanadan bildirilib ki, hazırda Ləman Xasıyeva klinikada deyil. Sualları cavablandırmaq üçün isə məsul şəxs yoxdur.
Qeyd edək ki, hadisə ilə bağlı Sabunçu Rayon Prokurorluğunda cinayət işi açılıb, araşdırma aparılır.
Daha ətraflı videomaterialda:
Geri qayıt