ABŞ qüvvələri Ermənistana gəlir, İran yenə SUSUR...
Dünən, 10:06
Xəbər verdiyimiz kimi, Ermənistan XİN rəhbəri Ararat Mirzoyanın Vaşinqton səfəri fonunda ABŞ dövlət katibi Entoni Blinkenlə onun arasında strateji tərəfdaşlıq haqqında saziş imzalanıb.
Bundan başqa bəlli olur ki, sərhəd təhlükəsizliyi məsələsində birgə iş aparmaq məqsədilə ABŞ Ermənistana xüsusi sərhəd mühafizə qrupu göndərəcək.
Aydın məsələdir ki, bu addımlar regionda sabitliyə deyil, gərginliyin artmasına xidmət edir.
Bu isə region ölkələrinin narahatlığına səbəb olmalıdır. Amma maraqlıdır ki, ABŞ-a özünün bir nömrəli düşməni kimi baxan İran İrəvanla Vaşinqton arasında imzalanan razılaşmalara göz yummaqda davam edir. Halbuki, digər qonşular hansısa başqa bir ölkə ilə müəyyən sazişlər imzalayan kimi Tehran hay-küy qaldırır.
İrəvana münasibətdə isə həmişə olduğu kimi, Tehran yenə də susur.
Mövzu ilə bağlı Bizim.Media-ya açıqlama verən siyasi elmlər doktoru, professor Elşad Mirbəşiroğlunun fikrincə, İranın ABŞ-Ermənistan strateji tərəfdaşlıq məsələsinə sakit yanaşması Tehranın özünün də regionda gərginlik yaranmasında maraqlı olduğuna işarədir:
“ABŞ-la Ermənistan arasında strateji tərəfdaşlıq sazişinin imzalanması bütövlükdə region üçün yaxşı heç nə vəd etmir. ABŞ bir qayda olaraq strateji tərəfdaş etdiyi ölkələrdən həmin coğrafiyada gərginlik yaradılması üçün istifadə edib. Deməli, Cənubi Qafqaz regionunda da Ermənistan özünü ABŞ-ın tam olaraq aləti rolunda təsdiq edir.
Sözügedən sənədə əsasən, ABŞ Ermənistana hərtərəfli dəstək nümayiş etdirəcək. Burada həmçinin hərbi dəstəkdən də söhbət gedir. Vaşinqtonla İrəvan arasında hərbi əməkdaşlıq inkişaf etməkdədir. Birgə hərbi təlimlər keçirlər. Eyni zamanda, Ermənistan sərhədlərinə ABŞ-ın sərhəd mühafizəçiləri göndəriləcək. Bu isə ilk növbədə İranı ciddi narahat etməlidir. Çünki İrana qarşı sanksiyaların əsas təşəbbüskarı məhz ABŞ-dır”.
Ekspert qeyd edir ki, İran isə Ermənistanın bu hərəkətinə həmişə olduğu kimi susur:
“İran Ermənistanın bu addımı ilə bağlı sadəcə olaraq, prosesləri seyr etməklə kifayətlənir. Bu isə sual doğurur. Ermənistana İranla münaqişə vəziyyətində olan Qərb dövlətləri yaxından və hərtərəfli dəstək göstərməkdədir. Avropa İttifaqının müşahidə missiyası da Ermənistandadır. Tehran bu məsələdə də susmağa üstünlük verib.
Yayılan məlumatlara görə, həmin müşahidə missiyası da binokl diplomatiyası ilə məşğuldur.
İrəvanla Vaşinqton arasında strateji tərəfdaşlıq isə bütövlükdə İranın da yerləşdiyi regionda gələcəkdə yenidən gərginlik yarada və Ermənistan yenidən münaqişə tərəfinə çevrilə bilər. Gələcəkdə ondan da gərginlik yaradılması üçün istifadə oluna bilər. Belə bir vəziyyətdə İran baş verən prosesə göz yumursa, deməli onun özü də regionumuzda növbəti gərginliyin yaranmasında maraqlıdır”.
Geri qayıt