İordaniyadan Azərbaycana qarşı təəssüf doğuran ADDIM
Bu gün, 10:36
İordaniya Kral Film Komissiyası İordaniya əsilli erməni rejissor Sarin Ayrapetyanın “Mənim şirin ölkəm” sənədli filmini “Ən yaxşı xarici film” nominasiyası üzrə “Oscar” mükafatına təqdim etmək üçün seçib.
Bizim.Media xəbər verir ki, bu barədə “Deadline.com” nəşri məlumat yayıb.
Qeyd edək ki, sözügedən filmdə keçmiş Qarabağ münaqişəsi ilə bağlı reallıqlar açıq şəkildə təhrif edilib. Filmdə Qarabağda yaşayan və diş həkimi olmaq arzusunda olan 11 yaşlı Vrejen adlı erməni uşağın hekayəsindən bəhs edilir. Ekran işində həmin uşağın Azərbaycana qarşı döyüşməyə hazırlaşmasından bəhs olunur. Filmin adından da göründüyü kimi, tarixə qovuşmuş Qarabağdakı qondarma rejim “şirin ölkə” kimi təqdim olunur.
Təbii ki, İordaniyanın bu addımı heç də anlaşılan deyil.
Çünki İordaniya ilə Azərbaycan arasında münasibətlər yüksək səviyyədədir. İordaniya Haşimilər Krallığı Azərbaycan Respublikasının müstəqilliyini ilk tanıyan dövlətlərdən biridir. Azərbaycan ilə İordaniya arasında diplomatik münasibətlər isə 13 fevral 1993-cü il tarixində qurulub. 28 may 2006-cı il tarixində Azərbaycan Respublikasının İordaniyada, 2007-ci ilin may ayının 5-də isə İordaniyanın Azərbaycanda Səfirliyi açılıb.
2006-2010-cu illərdə isə ölkələrimiz arasında münasibətlərin ən yüksək səviyyədə olduğu dövr hesab olunur. Bu 4 il ərzində İordaniya kralı II Abdullah Azərbaycana üç dəfə səfər edib.
Qarşılıqlı münasibətlər sonrakı illərdə də davam edib və hər iki ölkənin rəsmiləri arasında çoxsaylı görüşlər baş tutub. Hətta 2015-ci ilin 12 iyunda İordaniya şahzadəsi Feysal bin Hüseyn Bakıda 1-ci Avropa Oyunlarının açılış mərasimində iştirak edib. Bundan əlavə, Azərbaycan və İordaniya arasında bir çox müqavilələr də imzalanıb.
Bəs İordaniya niyə erməni təbliğatına həsr olunan filmi Oskara namizəd göstərdi?
İş orasındadır ki, İordaniya və Ermənistan arasında da strateji əlaqələr mövcuddur. Kral II Abdullanın 2020-ci ilin fevralında İrəvana səfəri Ermənistanla hərbi-texniki əməkdaşlığı əhəmiyyətli dərəcədə sürətləndirdi.
Həmin ilin iyulunda, Tovuz döyüşlərindən bir neçə gün sonra isə İordaniyanın Ermənistana silah satışı ilə bağlı məlumatlar yayıldı:
“Hazırda İordaniya və Ermənistan arasında sıx hərbi-texniki əməkdaşlıq İrəvana silah və sursatların, xüsusilə İordaniyada istehsal olunan RPQ-32 əl qumbaraatanlarının tədarükü də daxil olmaqla geniş spektri əhatə edir. 2013-cü ildən İordaniya Rusiyadan sonra bu tip qumbaraatan istehsal edən ikinci ölkədir və Əmmanda bu silahın rəsmi adı - "Nashshab"dır. Hazırda İordaniya bu qumbaraatanları xarici bazara, xüsusən də Ermənistana təqdim edir”.
Bu məlumatların üzə çıxmasından cəmi 3 gün sonra, iyulun 27-də İordaniyanın Azərbaycandakı səfiri Xarici İşlər Nazirliyinə çağırıldı. Həmin görüşdə İordaniya tərəfinin işğalçı ölkəyə silah satması ilə bağlı yayılan xəbərlərin geniş ictimaiyyətdə narazılıqla qarşılandığını səfirin diqqətinə çatdırıb. İordaniya səfiri Azərbaycan tərəfinin narahatlığını anladığını qeyd edib. Azərbaycanla mövcud olan əlaqələrin strateji xarakterini nəzərə alaraq, mövcud narahatlığın aradan qaldırılması üçün bütün səylərini göstərəcəyini vəd edib.
Cəmi iki gün sonra İordaniya XİN bəyanat yayaraq, Ermənistana silah göndərmələri ilə bağlı məlumatı rəsmən təkzib etdilər.
İordaniyanın bu addımı təəssüf doğurur...
2020-ci ildəki bu diplomatik soyuqluqdan sonra ölkələrimiz arasında münasibətlər yenidən normallaşıb. Hətta bu ilin aprelində iki ölkə arasında müdafiə sahəsində əməkdaşlıqla bağlı saziş də imzalanıb.
Bütün bu faktorları nəzərə aldıqda, İordaniyanın erməni təbliğatına həsr olunan filmi dünyanın ən nüfuzlu film müsabiqəsinə təqdim etməsi heç də anlaşılan deyil. İstənilən halda, Azərbaycanın ərazi bütövlüyünə dəstəyini bildirən, ölkəmizlə böyük əməkdaşlıq əlaqələrinə sahib olan bir ölkənin bu addımı atması təəssüf doğurur.
Geri qayıt