İmişli Rayon Məhkəməsində dələduzluqda təqsirləndirilən Şamxal Nurullayevin cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Lətafət Ağakişiyevanın sədrliyi ilə keçirilən prosesdə hökm oxunub.

Məhkəmənin hökmü ilə cinayət təqibinə xitam verilib və o, cinayət məsuliyyətindən azad edilib. Təqsirləndirilən şəxs barəsində seçilmiş polisin nəzarəti altına vermə qətimkan tədbiri ləğv olunub.

İttihama görə, Şamxal Nurullayev etibardan sui-istifadə etmə və aldatma yolu ilə özgənin xeyli miqdarda əmlakını ələ keçirmək məqsədi ilə tanışı olan zərərçəkmiş Zabulla Qarayevi (soyadı şərtidir) aldatmaq qərarına gəlib. O, yüksək əmək haqqı olan işlə təmin edəcəyi barədə yalan vəd verərək, 2023-cü ilin sentyabr ayında İmişli rayonu, Çahar kəndi ərazisində yerləşən “Sünbül” adlı kafedə onunla görüşüb, 9000 manat məbləğində pulu aldıqdan sonra vədinə əməl etməyərək həmin pulu mənimsəyib.

Beləliklə, təqsirləndirilən şəxs etibardan sui-istifadə etmə və aldatma yolu ilə özgənin 9000 manat məbləğində pul vəsaitini ələ keçirməklə, zərərçəkmiş şəxsə xeyli miqdarda maddi ziyan vuraraq dələduzluq cinayəti törədib.

Məhkəmə iclasında Şamxal Nurullayev özünü təqsirli bilib və ifadəsində göstərib ki, o, 2015-ci ildən 2023-cü ilin sonuna qədər Milli Məclisin deputatı, Milli Cəbhə Partiyasının sədri Razi Nurullayevin sürücüsü kimi çalışıb, həmçinin onun qardaşı oğludur.

Təqsirləndirilən şəxs İmişli rayon sakini, zərərçəkmiş Zabulla Qarayevi əvvəldən tanıdığını, onun əvvəllər işsiz olduğunu, deputat Razi Nurullayevin xahişi ilə “Azərbaycan Dəmir Yolları” QSC-nin İmişli stansiyasında işə düzəldildiyini bildirib.

Onun sözlərinə görə, 2023-cü ilin sentyabr ayında İmişlidə olarkən Zəbulla ona müraciət edərək, iki nəfər tanışının pul müqabilində dəmir yolunda işlə təmin olunub-oluna bilməyəcəyini soruşub: “Zəbulla əlavə etdi ki, həmin şəxslər işə düzəlmək üçün müəyyən məbləğdə pul verməyə razıdırlar. Məsələ ilə maraqlanacağımı bildirib və təxminən iki gün sonra Zəbulla ilə yenidən əlaqə saxladım. O, isə mənə 9000 manat məbləğində pulu topladığını və gətirəcəyini dedi. Razılaşmaya əsasən, biz İmişli rayonunda yerləşən “Sünbül” adlı kafedə görüşdük, orada yemək yeyərkən Zəbulla 50 və 100 manatlıq əsginaslardan ibarət 9000 manat pulu mənə təqdim etdi. Pulu aldıqdan sonra Bakıya qayıtdım və həmin vəsaiti şəxsi ehtiyaclarım üçün xərclədim”.

Təqsirləndirilən şəxs aldığı pulu əsasən borclarının ödənilməsinə və şəxsi xərclərinə sərf etdiyini, maddi vəziyyətinin ağır olması səbəbindən belə addım atdığını qeyd edib.

Şamxal Nurullayev tutduğu əməldən səmimi peşman olduğunu, zərərçəkmiş şəxsə vurulan ziyanı tam şəkildə ödədiyini, aralarında barışıq əldə olunduğunu, zərərçəkmişin ona qarşı şikayət və tələbinin qalmadığını, həmçinin vurulmuş zərərin 25 faizi – 2250 manat məbləğində vəsaiti dövlət büdcəsinə ödəmiş olduğunu söyləyib O, bu halları nəzərə alaraq cinayət işinə xitam verilməsini məhkəmədən xahiş edib.

Məhkəmə iclasında zərərçəkmiş Zabulla Qarayev ifadəsində deyib ki, 2021-ci ilin oktyabr ayından “Azərbaycan Dəmir Yolları” QSC-nin İmişli stansiyasında mühafizəçi vəzifəsində çalışıb, lakin aldığı əmək haqqı ilə ailəsini dolandıra bilməyib. Bu səbəbdən 2023-cü ilin yayında rayonun deputatı Razi Nurullayevin qəbuluna getmək qərarına gəlib. Orada onu rayondan tanıdığı Şamxal Nurullayev qarşılayıb və deputatla görüşü məhz özünün təşkil edəcəyini bildirib.

Zərərçəkmiş şəxs Şamxala iş axtardığını bildirəndə, o, 10 000 manat müqabilində aylıq 1000 manat maaşlı işə düzəldəcəyinə söz verib. Bu vədə inanaraq, zərərçəkmiş şəxs dostlarından və tanışlarından 10 gün ərzində 9000 manat məbləğində pul toplamağa nail oduğunu dilə gətirib.

Onun sözlərinə görə, Şamxalla İmişli rayonu, Qulubəyli kəndi ərazisində yerləşən “Sünbül” adlı kafedə görüb və orada ona 50 və 100 manatlıq əsginaslardan ibarət 9000 manat pulu təhvil verib: “Şamxal isə məbə nüfuzlu tanışlarının vasitəsilə işə düzəldəcəyini bildirdi. Təxminən iki həftə sonra Şamxal zəng edərək sənədlərin hazırlandığını və yaxın zamanda işə qəbul ediləcəyini vəd etdi. Lakin təxminən 3 ay keçməsinə baxmayaraq, vəd edilən işlə bağlı heç bir nəticə əldə olunmadı. Sonradan məlum oldu ki, Şamxal artıq işdən azad olunub”.

Zərərçəkmiş şəxs onun qohumları ilə əlaqə saxladığını, lakin pulu geri ala bilmədiyini söyləyib.

Bundan başqa, Zabulla Qarayev ibtidai istintaq zamanı ərizə təqdim edərək təqsirləndirilən şəxs ilə barışmasını, ona vurulmuş ziyanın tamamilə ödənilməsini, Şamxala qarşı şikayət və tələbinin olmamasının nəzərə alınmasını xahiş edib.