“Azərbaycan dünyada nadir ölkələrdən biridir ki, müharibədə qalib gələndən və suverenliyini tam bərpa etdikdən sonra qarşı tərəfə sülh əlini uzadır”.

Bu sözləri Milli Məclisin deputatı Vüqar İskəndərov “Cebheinfo.az”-a açıqlamasında deyib.

O bildirib ki, dünya müharibə tarixində belə faktlar çox azdır:

“Belə bir nümunəni qoyan ilk ölkə Azərbaycandır, Prezident və Ali Baş Komandan İlham Əliyevdir. Digər məsələ isə artıq sülh müqaviləsinin imzalanması üçün vacib olan addımların atılmasıdır.

Biz artıq bununla bağlı Ermənistanla ikitərəfli olaraq bir çox nümunələri ortaya qoymuşuq. Etiraf etmək lazımdır ki, artıq bu sahədə nailiyyətlər də mövcuddur. 8 avqustda keçirilən Vaşinqton görüşündə artıq sülh müqaviləsinin müddəaları paraflanıb.

Yalnız artıq əsas şərtlərdən biri Ermənistan Konstitusiyasının dəyişdirilərək İrəvanın Azərbaycan və Türkiyəyə qarşı olan ərazi iddialarının əsas qanundan götürülməsi qalıb. Ermənistan rəsmi olaraq bu məsələni də həll etməlidir”.

Millət vəkili Azərbaycanın Ermənistana yük tranzitinə dair bütün məhdudiyyətləri aradan qaldırması barədə də danışıb:

“Azərbaycan tərəfinin bu humanitar jesti və cənab Prezidentin Astanada verdiyi bəyanat yüksək qiymətləndirilir. Ermənistanın Baş nazir Nikol Paşinyan da buna görə İlham Əliyevə təşəkkür etdi. Artıq Qazaxıstan taxılı Azərbaycan üzərindən Ermənistana doğru aparılır. Bu isə kommunikasiyanın açılmasıdır.

Yenə də cənab İlham Əliyev bütün dünyaya göstərdi ki, onun sözü imzasıdır. Cənab Prezident demişdi ki, kommunikasiyaların açılması ilə Ermənistan da nəfəslik əldə edə biləcək və fayda görəcək. Artıq əməli addımı Azərbaycan tərəfi atıb. Paşinyan da türk ölkələrində də müsbət qarşılanan addımlar varın olduğunu deyib”.

Vüqar İskəndərov vurğulayıb ki, Azərbaycan və Türkiyə tərəfinin atdığı xoşməramlı addımlara Ermənistan da adekvat cavab verməlidir:

“Rəsmi İrəvan üzərinə düşən məsələləri həll etməlidir. Nikol Paşinyan qarşılıqlı olaraq kommunikasiyaların açılması, Azərbaycan və Türkiyədən gələn malların Ermənistan üzərindən Gürcüstana daşınmasına dəstək ola biləcəyini dedi.

Təbii ki, bunlar müsbət qiymətləndirilir. Əlbəttə ki, bu addımların real olması Ermənistandan asılıdır. Çünki Azərbaycan öz üzərinə düşən vəzifələri uğurla icra edib və etməkdədir. Qarşılıq olaraq Ermənistanın da Azərbaycanın atdığı müsbət jestlərə və addımlara mütləq cavab verməsi vacibdir”.

Deputat diqqətə çatdırıb ki, yalnız bundan sonra sözün əsl mənasında real sülhün əldə olunması, kommunikasiyaların açılması, artıq iki ölkə arasındakı münasibətlərin real və müsbət məcraya düşməsi deməkdir:

“Zaman-zaman qarşılıqlı əlaqələrin də qurulması mümkün ola bilər. Bu, o zaman alınacaq ki, Ermənistan real və rasional addımlar atsın, erməni cəmiyyəti artıq sülhü dərk etsin, rəsmi İrəvan bununla bağlı işlər görməyə başlasın. Arzu edərdik ki, bu işlər uğurla nəticələnsin və iki ölkə arasında bütün sahələrdə qarşılıqlı, faydalı əməkdaşlıq mühiti mümkün olsun”.