Son günlərdə Azərbaycan-Ermənistan sərhədində müşahidə olunan aktivlik regionda yeni müharibə riskini təkrar gündəmə gətirib. Ermənistan ordusununun Azərbaycan Silahlı Qüvvələrinə məxsus mövqeləri atəşə tutması və bu təxribatları yalanlaması diqqət çəkir.

Azərbaycan Prezidenti İlham Əliyevin yanvarın 7-də yerli televiziya kanallarına müsahibəsi zamanı İrəvana açıq mesajları erməni ictimaiyyətində ciddi müzakirələrə səbəb oldu. Avropada müşahidə olunan kritik böhran, ermənilərin ən böyük dəstəkçisi olan Fransa Prezidenti Emmanuel Makronun sürətlə nüfuz itirməsi, həmçinin Kanadanın ermənipərəst Baş naziri Castin Trüdonun istefası, ABŞ-da erməni lobbisinin arxasında dayandığı Prezident Co Bayden Administrasiyasını Donald Trampın əvəzləməsi Ermənistan ictimaiyyətində narahatlığı artırıb. Qərbyönümlü siyasət xəttinin seçilməsi və son zamanlarda Rusiya ilə müşahidə olunan gərginliklər nəzərə alınaraq artıq İrəvanın güvənə biləcəyi güclü müttəfiqinin qalmadığı bildirilir. Beləliklə, təxribat xarakterli addımlar davam edərsə, baş verə biləcək eskalasiyadan yenə erməni əhalisi özlərinin zərərli çıxacaqlarını qeyd edirlər.

Bölgədəki ümumi ab-hava müharibə öncəsi vəziyyətdir? Növbəti qarşıdurma halında qlobal güclərin prosesə yanaşması necə olacaq?

Globalinfo.az-a danışan politoloq Oqtay Qasımov deyib ki, Cənubi Qafqazda Azərbaycan ilə Ermənistan arasında sülh müqaviləsi imzalanmadığı müddətdə təxribatlar, o cümlədən müharibə ehtimalı qalacaq:

“Prezident İlham Əliyevin son müsahibəsində səsləndirdiyi fikirlərdən bir daha görünür ki, Bakı sülh müqaviləsindən yanadır. Prezident açıq şəkildə regionda vəziyyəti qarışdırmağa çalışan, gərginlik yaradan qüvvələrin də adını çəkdi, onların məqsədlərinin nə olduğunu bir daha dedi. Ermənistan tərəfinin törətdiyi təxribatlar, əlbəttə ki, narahatlıq yaradır. Amma Azərbaycan da prosesləri müşahidə edir, Ermənistanın silahlanması diqqətlə izlənilir. Bu məsələ təhdidedici bir mərhələyə gəlib çıxarsa, rəsmi Bakı da adekvat tədbirlər görə bilər.

Bu il ərzində irimiqyaslı toqquşmanın olacağını gözləmirəm, lakin müəyyən insidentlərin baş verməsi mümkündür. Hələ yeni ilin ilk günlərindən etibarən şərti dövlət sərhədində İrəvanın təxribat cəhdləri qeydə alınıb”.

Politoloq bildirib ki, ABŞ-da yeni administrasiya işə başladıqdan sonra ümumi vəziyyətə daha doğru qiymət vermək olar:

“Yeni seçilmiş Prezident Donald Tramp administrasiyası Rusiya-Ukrayna müharibəsini bitirməkdə qərarlıdır. Lakin bu, o demək deyil ki, Tramp hakimiyyətə gəldikdən sonra bütün müharibələr tamamilə dayanacaq, bu, bir illüziyadır.

Cənubi Qafqazda marağı olan ölkələrdən biri də Fransadır. Paris digər regionlarda üzləşdiyi uğursuzluqları kompensasiya etmək üçün Qafqazda fəallığını artırmağa çalışır.

Lakin regionumuzda gedən mübarizədə həlledici faktor isə şübhəsiz Türkiyə-Azərbaycan tandemidir. Adıçəkilən beynəlxalq güclər Bakı-Ankara ittifaqını nəzərə almalı olacaqlar”.