Siyasətdə “falsstarta” düşənlər:
10-06-2015, 08:37
Adətən səbrlərini cilovlaya bilməyən, iradəsi zəif idmançılar bu sınaqdan keçə bilmir. Başqa sözlə falsstarta düşür. Bu aralar Azərbaycanla bağlı siyasi arenada “qara piar” kampaniyası aparanlar, obrazlı desək, həmin məsələdə hamıdan çox Roma papası olmaq istəyənlər də bu sınaqla bacarmırlar . Okeanın o tayında İlk Avropa Oyunlarına 2 gün qalmış görüşüb , bu oyunların Azərbaycana nə verəcəyi ilə bağlı müzakirə etməyi sanki özlərinin şəxsi hüququ hesab edənlər kimi. İyunun 10-da Vaşinqtonda “Avropa oyunlarının real qiyməti» mövzusunda təşkil olunacaq və bütünlüklə anti-Azərbaycan xarakteri daşıyacaq yığıncağın təşkilatçıları və iştirakçıları indi məhz bizim nəzərimizdə idman qanunlarını bilməyən “idmançı” statusundadırlar.
Başlayaq ABŞ-ın Azərbaycandakı keçmiş səfiri Riçard Kozlariçdən. Son dövrdə onun anti-Azərbaycan fəaliyyətində aktivliyi diqqəti cəlb edir. Kozlareçin ABŞ Konqresində keçirilən dinləmələrdə Azərbaycanla bağlı səsləndirdiyi qərəzli iddialar hələ də xatirimizdədir. Keçmiş amerikalı səfir sanki Azərbaycana qarşı səlib yürüşünün təşkilatçısı rolunu oynamağa çalışır və bütün çağırışlarının sonunda Azərbaycana qarşı sanksiyaların tətbiqini tələb edir. Bu əsnada sual doğura bilən məqamlar var.
Onun Azərbaycandakı fəaliyyəti də məhz həmin prinsiplər üzərində qurulmuşdu? Yaxud həqiqətənmi onun rəsmi diplomatik fəaliyyətinin arxasında məhz antiazərbaycançılıq, Azərbaycanda radikal müxalifətlə sıx əlaqə, həmçinin Azərbaycanı ABŞ-ın müəyyən mərkəzlərinin təsiri altına salmaq cəhdi dayanırdı?
Cənab Kozlariç 15 ildən çoxdur ki, Azərbaycanı tərk edib. Əminlik var ki, o da digər səfirlər kimi Azərbaycan xalqının qonaqpərvərliyi, milli mətbəxi, nəhayət insanları haqqında xoş sözlər deyərək Bakıdan ayrılıb. Amma illər amansızdır. Xüsusilə yaxşı həyat tərzi , aylıq yüksək maaş və ildə bir dəfə dünyanın ən gözəl guşəsində istirahət etmək imkanı olan “diplomat həyatı” bitəndən sonra insanlar dəyişir. Bu dəfə bunun bariz nümunəsi Riçard Kozlariçin baxışlarında müşahidə edilir. Azərbaycana qarşı "qara piar" kampaniyasını maliyyələşdirənlər də bu amili yaxşı bilirlər. Təsadüfi deyil ki, bu dəfə kimliyi bizlərə yaxşı məlum olan Riçard Kozlariçi danışdırırlar.
Onun Azərbaycanla hər hansı bağlılığı var. Yəqin düşünülür ki, belə bir şəxsin anti-Azərbaycan isteriyası ruhunda çıxışlar etməsi “qara piar” kampaniyasına əlavə dəstək verə bilər.
Ekspertlər hesab edirlər ki, bunun başlıca səbəbi Azərbaycanın müstəqil siyasəti, heç bir qüvvənin qarşısında baş əyməməsidir ki, bu amil müəyyən dairələri narahat edir. Məhz buna görə də həmin qüvvələr Azərbaycanı təsir altına almağa cəhd göstərir , niyyətləri baş tutmayanda isə saxta iddialara əl atırlar.
Bu tədbirdə əsas moderatorlardan olacaq Freedom House təşkilatının sabiq direktoru, anti-Azərbaycan əhval ruhiyyəli, islamafob David Kramer də cənab Kozlariçdən heç geri qalmır. O da vaxtilə ABŞ Dövlət Departamentində işləyib və o da sabiq sayılır. Xüsusilə vəzifədən gedəndən sonra Azərbaycana qarşı daim qərəzli mövqeyi ilə fərqlənən Kramerin əsas tələbi ABŞ-ın avropalı müttəfiqləri ilə birgə işləyərək Azərbaycan hökumətinə qarşı konkret ölçüləri nəzərdən keçirməsidir.
Bunların sırasında o, xüsusi olaraq ABŞ vətəndaşlarının Azərbaycana səyahət etməsinə dair xəbərdarlıq verilməsinin vacibliyini vurğulayır. Hətta bir qədər utopik səslənən fikirlərin də müəllifidir. Misal üçün Kramer iddia edir ki, guya Azərbaycana gedən amerikalılar izləniləcəklər. Cənab Kramerin bu açıqlamalarını eşidəndə, əslində ilk ağla gələn Hollivud filmlərində baxmağa adət etdiyimiz Amerika xüsusi xidmət orqanlarının iş stili yada düşür. Kramerin dövlət administrasiyasına Amerika xüsusi xidmət orqanlarından gəlməsi ilə belə açıqlamalar verməsi arasında da , hardasa uyğunluq tapmaq olar. Daha bir maraqlı məqam isə demokratiya və vicdan azadlığı məsələsini əlində şüar edən Kramerin islamofob, müsəlmanlara, ümumiyyətlə İslama mənfi münasibətinin olmasıdır. Hətta onun rəhbərlik elədiyi təşkilatın daha çox müsəlman və ərəb dünyasını hədəfə alması ona “İslam dünyasının revizoru” təxəllüsü qoyulması ilə nəticələnib.
Məhz Kramerin rəhbərlik etdiyi dövrlərdə ”Freedom House" –un hesabatlarında Türkiyə, Azərbaycan Pakistan, ərəb ölkələri və digər müsəlman dövlətləri qara rəngdə təsvir olunur, ən kiçik, əhəmiyyətsiz məsələlər şişirdilərək ümumbəşəri problem səviyyəsinə qaldırılır. Təsəvvür edin, bu təşkilatın hesabatlarında Türkiyə kimi İslam aləmində demokratiya etalonu olan bir ölkə Ermənistanla birgə “qismən azad ölkələr” kateqoriyasına daxil edilir.
Fransada qondarma “erməni soyqırımına” görə cinayət məsuliyyətini nəzərdə tutan qanunun qəbul edilməsinə cəhd, 2011-ci ildə iqtisadi siyasətə görə keçirilən kütləvi aksiyalar zamanı Böyük Britaniyada bloggerlərin həbsi, internetin məhdudlaşdırılması, “News of the World” qəzeti əməkdaşlarının kütləvi həbsi və nəhayət medianın fəaliyyətinə nəzarətin tətbiqi, ABŞ hərbçiləri tərəfindən İraqda “Röyters” agentliyinin əməkdaşlarının qətlə yetirilməsi, Liviyada üsyançılar tərəfindən məhşur jurnalist Qalya əl-Misratiyə işgəncələr verilməsi, öldürülməsi və digər bu kimi onlarla fakt qulaqardına vurulur. Sanki Quantanamo, bütün dünyada insanların izlənməsi və digər bu kimi faktlar yoxdur. Nədənsə bu təşkilat elə cənab Kramerin vətəndaşı olduğu Birləşmiş Ştatlarda Baltimor və Freqyuson hadisələrini , qaradərili amerika vətəndaşlarının polis tərəfindən qətlə yetirilməsini, Ərəb ölkələrində baş verən iğtişaşlarda minlərlə insanın öldürülməsini görmək istəmir.
Separatçılara rəğbət, müsəlmanlara nifrət bəsləyən Kramer və Kozlariç kimilərin bu saxta iddialardan əl çəkməməsi onu göstərir ki, onlar beynəlxalq ictimaiyyət üçün deyil, müəyyən dairələr üçün işləyirlər. Təəssüf ki, öz istəklərinə çatmaq istiqamətində bu amerikalılara kömək edənlər arasında əslən azərbaycanlı olanlar da var. Qərbdəki fəaliyyəti ilə Azərbaycanı hər bir vasitə ilə nüfuzdan salmaq istəyən, “Azadlıq” və “Amerikanın səsi” radiolarının birgə rusdilli proqramının icraçı redaktoru Kənan Əliyev (Kənan Kazımoğlu) və eynilə Azərbaycanı tənqid etməyi sanki öz devizinə çevirən , Türkiyə ermənilərinin “Aqos” qəzetində işləməsindən məmnun olan , “Nə olur-olsun, burada işimə davam edəcəm” deyən Arzu Qeybullayeva.
Ayın 10-u onlar da Vaşinqtonda Kramer və Kozlariçlə birlikdə İlk Avropa Oyunlarının açılığşını etməyə hazırlaşan Azərbaycanı tənqid etməyə , ölkəmizdə baş verənləri yalnız tünd rəngdə göstərməyə çalışacaqlar . Amerikalıları başı düşmək olar , onlar üçün itiriləcək bir şey yoxdur . Necə deyərlər şəxsi məsələ deyil, sadəcə biznesdir. Amma əslən azərbaycanlı olanlar üçün bu biznes həm də vətənə qarşı xəyanətə , satqınlığa bərabərdir.
İstənilən halda zaman göstərir ki, bu tipli əsassız tədbirlər və istehza doğuran bəyanatlar verən şəxslərin cəhdləri hər dəfə uğursuzluğa düçar olur. Çünki ABŞ-da Azərbaycanla münasibətlərə ciddi baxan və bu münasibətlərə hörmətlə yanaşan, ölkəmizdə demokratiyanın inkişafını görən və ona yüksək qiymət verən, Azərbaycanın bu gün müstəqil siyasətinin tək onun deyil, o cümlədən ABŞ-ın da maraqlarına cavab verdiyini yüksək qiymətləndirən dairələr və siyasətçilər az deyil. Bu gün ABŞ-da Azərbaycanın dostları on milyonlarla ölçülür və hesab etmək olar ki, bu cür tədbirin təşkilatçıları növbəti dəfə iflasa uğrayacaqlar . Çünki onların dedikləri nə ABŞ-ın maraqlarına cavab verir, nə də Azərbaycanda geniş bir dəstək qazana bilir.
Odur ki, Azərbaycanda keçiriləcək ilk Avropa oyunlarından əvvəl bu falsstarta düşənlər idman oyunları haqqında fikir yürütməkdənsə, idman qaydalarını yaxşı-yaxşı oxusunlar. Çünki qaydalara görə, 2 dəfə ardıcıl falsstarta düşən idmançı oyundan kənarlaşdırılır...
SİA Analitik Mərkəzi
Geri qayıt