"Azəriqaz" barəsində ən çox şikayət olunan dövlət qurumudur...
30-05-2015, 08:49
"Azəriqaz" İB-nin İctimaiyyətlə əlaqələr şöbəsindən verilən məlumata görə, Tovuz, Şəmkir, Ağdaş, Şamaxı rayonlarında və Bakı şəhəri Xəzər rayonunda təbii qaz təchizatında məhdudiyyətlər olacaq. Yeraltı və yerüstü qaz xətlərində yaranmış qaz sızmasının ləğvi və yeni çəkilmiş qaz xətləri üzərindəki qaztənzimləyici qurğuların qaz təchizatı mənbəyinə birləşdirilməsi ilə əlaqədar səhər saat 9:00-dan işlər başa çatanadək Tovuz, Şəmkir, Ağdaş, Şamaxı rayonlarının bir hissəsinə, həmçinin Bakı şəhəri Xəzər rayonunun Binə, Qala və Buzovna qəsəbələrinin bir hissəsinə təbii qazın verilişində fasilələr yaranacaq.
Təbii ki, bu kimi xəbərdarlıqları qış aylarında demək olar ki, hər gün eşitmək məcburiyyətində qalsaq da, isti havalarda da eşidirik. Ümumiyyətlə, son bir neçə ildir ki, "Azəriqaz" İB-də yaşanan problemlər, nöqsanların ardı-arası kəsilmək bilmir. "Təmir-quraşdırma, profilaktika və ya yeni xətlərin birləşdirilməsi" kimi standart səbəblər göstərərək az qala hər gün bir neçə rayonun, yaxud da yaşayış məntəqəsinin qaz təchizatını məhdudlaşdırırlar ki, bu da haqlı olaraq vətəndaşların etirazı ilə nəticələnir. Bəs görəsən, doğrudanmı "Azəriqaz"ın təmir-quraşdırma briqadaları bu cür intensiv işləyir və paytaxt Bakıda, rayonlarda "gözəgörünməz" təmir-quraşdırma işləri bu cür intensiv xarakter alıb? Təmir işləri gedir, lakin heç kəs görmür. Qazın verilişində fasilələr yarandıqdan və verilişi bərpa edildikdən sonra, təxminən yarım saat ərzində qəribə qoxulu hava gəlir və daha sonra qaz. Qeyd edək ki, bu durum yalnız bir ünvanda və yaxud yalnız paytaxtda yaşanmır. Bölgələrdə də, eyni durumdur. Daha doğrusu, bölgələrdə vəziyyət daha acınacaqlıdır. Bu isə əksər hallarda ya zəhərlənmələrlə, yaxud da, mənzillərdə partlayışla nəticələnir. Təbii ki belə hadisələr az olmayıb. Hətta ölüm hallarının da şahidi olmuşuq. Lakin çox təəssüflər olsun ki, belə hadisələrin yaşanması da, heç nəyi dəyişmir. Bu kimi durumlarda qurum, vətəndaşı günahkar edir, özü isə, necə deyərlər, sudan quru çıxmağı bacarır. Bütün yaşananlar, baş verən hadisələr bir daha göstərmiş olur ki, "Azəriqaz" bu gün öhdəsinə düşən vəzifəni layiqincə yerinə yetirə bilmir. Nəinki layiqincə, hətta icra etməli olduqları işi belə, bacarmır. Həmçinin qeyd olunan nöqsanlarla bağlı vətəndaşlar quruma şikayət etdikdə də, edilən müraciət və şikayətlərə baxılmır. Və hansısa şikayətə heç bir reaksiya verilmir. Görəsən, "Azəriqaz"ın hər gün bu və ya digər rayonda, yaşayış məntəqələrində hər dəfə eyni səbəb göstərərək qaz təchizatını kəsməsinin sirri nədədir? Bu qurum barədə daxil olan şikayətləri ümumiyyətlə, bütün xəbər portallarında görmək olar. Elə bizim redaksiyamıza da dəfələrlə bu qurumla bağlı şikayətlər daxil olub ki, bizlər də hər dəfə işıqlandırmağa, həmin şikayət və problemləri gündəmə gətirməyə çalışırıq. Ama onu da qeyd edək ki, sözügedən qurum barədə yazılanlara baxmayaraq, ortada irəliləyişə, həmin problemlərin aradan qaldırılması istiqamətində heç bir iş görülmür. Əksinə, "Azəriqaz"dakı problemlər günü-gündən daha da artaraq, daha geniş vüsət almış olur. Tez-tez qaz kəsilmələri, qaz sızmaları, qazın fasilələrlə verilməsi demək olar ki, hər gün daxil olan şikayətlərdəndir. Bakıətrafı rayonlarda vəziyyət daha acınacaqlı olsa da, paytaxt da onlardan geri qalmır. Sözügedən problem media və telekanallar tərəfindən işıqlandırılsa, gündəmə gətirilsə də, görünən odur ki, həlli istiqamətində hanısa addımlar atılmır. Əgər belə olsa idi, mənzillərə normal qaz verilişi bərpa olunardı. Ümumiyyətlə, bu məsələ dəfələrlə Milli Məclisdə müzakirə obyekti olub. Müxtəlif fikirlər səsləndirilib və həlli istiqamətində müzakirələr edilib. Amma çox təəssüflər olsun ki, bu gün ölkədəki mövcud qaz problemi hələ də, davam edir. Mütəxəssislərin sözlərinə görə, indi əhaliyə verilən təbii qazın tərkibində xeyli miqdarda yanmayan, yaxud tam yanmayan zəhərli qazlar var. Bu qazlar da istehlak olunan təbii metan qazının miqdarını təyin etmək üçün qurulan sayğacdan keçir, lakin yanmır. Yanmayan zəhərli qaz sızması mövcuddursa, otaqdakı hava qatışığında müəyyən həddə çatdıqdan 3 dəqiqə sonra insan huşunu itirir. Sinir sistemi iflic olur. Qan qatılaşır, oksigenlə təmin olunmur və o, qurbana çevrilir. Lakin bütün bu sadalananlara baxmayaraq, qurumun nə gördüyü iş normal hesab edilə bilməz, nə də qeyd olunan nöqsan və problemləri aradan qaldırmağa cəhd göstərmirlər. Bu gün bizlər yenə də mövcud problemləri, vətəndaşların müraciət və şikayətlərini gündəmə gətirməyə, işıqlandırmağa çalışırıq ki, ən azından hazırkı problemlərə əncam çəkilsin. Və vətəndaşlara normal qaz verilişi bərpa edilsin. \\ gundelik-baku \\
Geri qayıt