“Camalovlar imperiyası” süqut etmək ərəfəsində
26-07-2014, 11:12
Məlum olduğu kimi artıq uzun illərdir ki, Şirvan Şəhər İcra Hakimiyyətinə ölkənin Müdafiə Sənayesi naziri Yavər Camalovun qardaşı Mərdan Camalov rəhbərlik edir. Amma onun bu rəhbərliyi necə həyata keçirməsi barədə müxtəlif mənbələrin təqdim etdikləri məlumatlarda heç də ürək açan sözlərə rast gəlmək olmur: “Əslində Mərdan Camalov Şirvan şəhərinin sanki bir padşahıdır. Şəhəri istədiyi kimi, heç bir yazılı qanuna məhəl qoymadan idarə edir. Hansı sahədəki biznesi deyirsən nəzarətindədir. Səsini çıxaran da elə günə salınır ki, bir də söz deməyi ağlına belə gətirmir. Əslində, şəhərdə vəziyyət heç də ürəkaçan deyil. Mərdan Camalovun başı biznes fəaliyyətinə elə qarışıb ki, insanların necə dolandığı, gənclərin hansı işlərlə məşğul olması onu qətiyyən maraqlandırmır...” Bu da məlumdur ki, son illər Şirvanın sosial-iqtisadi inkişafının sürətləndirilməsinə büdcədən bir neçə milyon manat ayrılıb. Bu məbləğlə rayonda bəzi işlər görülsə də, yeyinti hallarına daha çox yol verildiyindən bir sıra obyektləri təmir etmək mümkün olmayıb.Təmir edilənlərdə isə ucuz tikinti materiallarından istifadə edilib. Yəni vəsaitin çoxu mənimsənilib. Qeyd edək ki, Şirvan ŞİH-nə rəhbərlik etməsinin artıq 9 ili tamam olan M.Camalov ölkə başçısının etimadından sui-istifadə edərək büdcə pullarını göyə sovurmaqla məşğuldur. Rayon sakinlərindən aldığımız bilgilərə görə, prezidentin rayona keçən ilki səfərindən sonra başçı özbaşınalıqlarını lap artırıb: “Şirvanda yalnız kosmetik işlər görülüb. İcra başçısı ölkə prezidentinə də məhz rayonun mərkəzi yerlərini göstərdi. Kəndlərdə və rayon mərkəzindən aralıda yerləşən yaşayış sahələrində vəziyyət dözülməzdir. Yollar yaman gündədir, kommunal problemlər əhalini boğaza yığıb. İcra başçısı heç bir vətəndaşın problemi ilə maraqlanmır. Özünün və qardaşının biznesini fikirləşir. Rayon camaatı onun haqqında dəfələrlə şikayət edib. Buna baxmayaraq, hələ də vəzifəsində qalır. Məmur o qədər özbaşınalıq edir ki, artıq buna tap gətirmək mümkün deyil. Dövlət büdcəsindən vəsait ayrılır ki, rayonda iş getsin, ancaq başçı sıravi insanları tikinti və təmizlik işlərinə cəlb edir...” Başçının fəaliyyətini tənqid edən sakinlərin sözlərinə görə, Mərdan Camalovun 9 illik rəhbərliyi dövründə Şirvanda nə qədər boş torpaq varsa, hamısı satılıb: “Rayonda elə adam yoxdur ki, başçının torpaq satışı ilə məşğul olduğunu bilməsin. Heydər Əliyevə adına olan meydanda yerləşən Şahmat məktəbini bölərək Samir adlı oğluna verməsi heç kimin yadından çıxmayıb. Həmin obyekt bu gün telefon mağazası kimi fəaliyyət göstərir. İcra hakimi rayonda hegemonluq edir. Heydər Əliyev Parkında böyük çayxanası, uşaq əyləncə qurğuları, müxtəlif ticarət köşkləri var. Burdan əldə olunan gəlir birbaşa başçıya çatır. Obyekt əvvəllər rayon rəhbərinin yaxın adamlarından sayılan Statistika İdarəsinin rəisi Məharət adlı şəxsin adına idi. Heydər Əliyev Mərkəzi tikiləndən sonra başçı əvvəlki yaşayış binasının altında olan Heydər Əliyev adına muzeyi də yaxın qohumlarına bağışladı. “Leyla” şadlıq sarayı və onun yaxınlığındakı torpaq sahəsi də icra başçısına məxsusdur”. Xatırlayırsınızsa ötən saylarımızda dərc etdiyimiz materiallarda Camalovların sahib olduqları biznes imperiyasına dair maraqlı açıqlamalar təqdim olunmuşdu. Qeyd olunmuşdu ki, Yavər Camalov məhz Müdafiə Sənayesi naziri postuna təyin olunduqdan sonra sürətlə ölkənin əsas oliqarxları sırasına inteqrasiyaya başladı. Bu gün isə nazir “Olimpik Star”, “Kral”, “Niaqara”, “Qızıl tac”, “Ambassador” və bir çox başqa obyektlərin də aid olduğu şadlıq evləri, otellər, sağlamlıq-istirahət mərkəzləri şəbəkəsinin sahibidir. Daxil olan məlumatlarda bildirilir ki, Yavər Camalovun malik olduğu böyük biznes şəbəkəsi Rusiyanın paytaxtı Moskva şəhərində də kifayət qədər sahələri əhatə etmişdir. Belə ki, mənbələr bu şəbəkəyə “Elita” ticarət mərkəzinin və əlbəttə ki, bir neçə restoran-şadlıq evi kompleksinin aid olduğunu bildirirlər. Maraqlıdır ki, bu komplekslər də Y.Camalovun Bakıdakı şadlıq evləri ilə eyni adlarla, “Kral”, “Niaqara” və sairə adlandırılıb. Ümumilikdə isə, məlumatlara görə, Müdafiə Sənayesi nazirinin Moskvadakı biznesinin aylıq dövriyyəsi 20 milyon ABŞ dollarından artıqdır. Yeri gəlmişkən qeyd edək ki, son vaxtlar ölkə mətbuatında Y.Camalovun təkcə Bakıda malik olduğu çoxsaylı mülklər barədə də maraqlı məlumatlar dərc olunmaqdadır. Hətta bəzi mənbələr nazirin Bakıda və ətraf qəsəbələrdə 50-yə yaxın villaya sahib olduğu bildirirlər...
Geri qayıt