Ya pambıq ək, ya da torpağı təhvil ver
22-03-2018, 14:51
Yerli məmurların vur deyəndə öldür siyasəti
Ölkədə qeyri-neft sektorunun inkiafı üçün dövlət başçısı pambıqçılıq, baramaçılıq, tütünçülüyün inkişafı üçün göstəriş verib. Artıq 3 ildir ki, rayonlarda pambıqçılığın inkişafı üçün əkin sahələri artılırılıb. Ancaq bu əkin sahələri boş torpaqlar vasitəsi ilə yox, heyvandarlıq, taxılçılıq və digər əkin sahələrindən kəsilərək pambqçılığa verilir.
Yenicag.az xəbər verir ki, Ağcabədi və Ağdam sakinlərini, torpaq sahəsi olan vətəndaşları təhdid edilərək, pambıq əkmələrinə məcbur edilirlər.
Ağdamda adlarının hallanmasını istəməyən bir neçə sahibkarla söhbət edən zaman bildirdilər ki, heyvandarlıq, əkinçilik üçün istifadə etdikləri torpaqları icra hakimiyyəti məcbur edir ki, pambıq əksinlər.
Rayon icra hakimiyyəti pambıq planını doldurmaq üçün tarixdə ilk dəfə olaraq Ergi düzündə pambıq əkilməsini sahibakarlara tapşırıq verib. Ergi düzü sovet zamanında belə heyvandarlıq, taxılçılıq və soğan əkini üçün istifadə edilib. Yəni sovet höküməti belə pambıq planını doldurmaq üçün bu düzdən istifadə etməyib. Ancaq Ağdam rayon icra hakimiyyəti Ergi düzündə pambıq əkilməsi üçün sahibkarları və torpaq sahəsi olan şəxsləri məcbur edir ki, pambıq əksinlər. Sahibkarlar bildirir ki, həmin pambıq sahəsi soğan, heyvandarlıq və taxıl üçün ayrılmış torpaqlardan kəsiləcək. Nəticədə zərbə heyvandarlığa, soğana və taxıla dəyəcək. Sahibkarların sözlərinə görə, ətin qiymətinin artmasının səbəbi də məhz pambığın məcburi əkilməsi nəticəsində qalxdı. Heyvandarlıq üçün torpaq sahəsi azaldığı üçün heyvan saxlayanlar məcburən mal-qarasını dəyər-əyməzə bazara çıxardı. Heyvandarlıq üçün torpaq sahəsinin azaldılması, heyvanların sayının azalmasına da gətirib çıxarıb.
Ağcabədi sakinlərinin sözlərinə görə isə, icra hakimiyyəti torpaq sahəsinin yarısında pambıq əkməyən şəxslərin torpaqları əllərindən alacağı ilə hədələnib. Pambıq əkmək istəməyən şəxslərlə dövlətə qarşı çıxmış kimi davranılır. Sahibkarlar bildirir ki, əgər bu torpaqlar vətəndaşlara verilibsə niyə məcbur edirlər bizə sərf etməyən, xərci çox olan pambığı əkək? Ağcabədidə kifayət qədər boş torpaq var ki, orada pambıq əkmək olar. Niyə o torpaqlar əkilmir, bizim əkin torpaqlarımıza göz tikiblər?
Əldə etdiyimiz məlumata görə, boş torpaqlarda drenaj sistemi yoxdur, o torpaqların əkin üçün hazır edilməsi üçün çoxlu işlər görmək lazımdır. Bu işləri görmək yerinə, icra hakimiyyətləri özlərini dövlət yanında xoş göstərmək üçün əkinə yararlı, vətəndaşlara məxsus torpaqlara üstünlük verirlər. Sahibkaralara məxsus olan torpaqlarda pambıq əkilməsi üçün isə, icra hakimiyyətləri hər cür təhdid və hədə-qorudan istifadə edirlər.
Sahibkarlar qeyd etdi ki, kimə müraciət edəcəklərini bilmirlər. Adların açıqlanmasından da qorxurlar. Yerli məmurlar nəinki torpaqlarını, hər şeylərini əllərindən ala bilərlər.
Geri qayıt