Enerji Gömrük İdarəsindən Prezidentə və 1-ci Vitse-prezidentə şikayət
2-03-2017, 07:58
Bu günlərdə LEGİON-da “İş adamı Enerji Gömrük İdarəsindən Prezident yanında Apellyasiya Şurasına şikayət etdi” başlıqlı yazı dərc olunmuşdu. Həmin yazıda bildirilirdi: “Bu günlərdə “Rovel Trading” MMC-nin direktoru İntiqam Əliabbas oğlu Həsənov Enerji Gömrük İdarəsinin rəisi Vaqif İbrahimovun və həmin idarədə maliyyə şöbəsinin rəisi Rəfael Niftəliyevin ondan və şəriki Həmid Vəkilovdan qisas almağa çalışması barədə LEGİON-a açıqlama vermişdi.
Fevralın 10-da LEGİON-la yenidən əlaqə saxlayan iş adamı bildirdi ki, məsələ ilə bağlı Azərbaycan Prezidenti yanında Apellyasiya Şurasının sədri Eldar Nuriyevə müraciət ünvanlayıb”. LEGİON əməkdaşı martın 1-də İntiqam Həsənovla əlaqə saxlayaraq, problemin həlini tapıb-tapmadığı barədə maraqlandı. İ.Həsənov qeyd etdi ki, DGK rəhbərliyi tərəfindən qərəzli süründürməçilik hələ də aradan qalxmayıb və o, məsələ ilə bağlı Prezident İlham Əliyevə və Birinci Vitse-Prezident Mehriban Əliyevaya məktubla müraciət edib.
İ.Həsənov müraciətin surətini Prezident yanında Apellyasiya Şurasının sədri Eldar Nuriyevə də göndərdiyini qeyd edib. Sözügedən müraciəti oxuculara təqdim edirik:
“Cənab Prezident! Siz daim yerli sahibkarların yanında olmuş, ölkə iqtisadiyyatının inkişafı naminə, milli biznesin çiçəklənməsində maraqlı olmuşsunuz. Dövlət idarəçiliyinin möhkəmlənməsi, vətəndaşların problemlərinin səmərəli həlli istiqamətində atdığınız addımları, xüsusilə də, son günlər ölkə ictimaiyyəti tərəfindən sevinclə qarşılanan təyinatı biz də öz növbəmizdə dəstəkləyir və alqışlayırıq.
Düşünürük ki, istər millət vəkili kimi, istərsə də Heydər Əliyev Fondunun Prezidenti olaraq milyonlarla azərbaycanlının rəğbətini qazanan Mehriban Əliyevanın Birinci Vitse-Prezident təyin olunması dövlət idarəçiliyinin möhkəmlənməsinə xidmət edəcək, müxtəlif qurumları öz sərvət mənbəyinə çevirən bəzi məmurların mərkəzdənqaçma meyillərinin qarşısını alacaq.
İnanırıq ki, vitse-prezident strukturunun tətbiqi Azərbaycanda dövlət idarəçiliyinin yeni və parlaq mərhələsini başlatmış olacaq. Son zamanlar üzləşdiyimiz problemlərin, məmur süründürməçiliyinin aradan qaldırılması istiqamətində Sizin mühüm addımlar atacağınıza ümid edirik. Bundan əvvəl Prezident yanında Apellyasiya Şurasının sədri Eldar Nuriyevə məktubla müraciət etmişdik. Həmçinin, Dövlət Gömrük Komitəsinin sədri Aydın Əliyevə də müraciətimiz nəticəsiz qalmışdır. Dövlət Gömrük Komitəsinin Enerji Gömrük İdarəsi bizim gömrük bəyannaməsini qanunauyğun şəkildə elan etməyimiz və rüsum ödəməyimizə baxmayaraq, bizə qarşı qərəzli münasibətlər göstərir, süni ittihamlarla məhkəmələrdə süründürür.
Əvvəla qeyd edim ki, 2016-cı ilin oktyabrında mənim şərikim Həmid Vəkilov Apellyasiya Şurasına müraciət ünvanlamış, Enerji Gömrük İdarəsinin maliyyə şöbəsinin rəisi Rəfael Niftəliyevin idxal edilən malları rəsmiləşdirməkdə maneə törətdiyini bildirmişdi.
Həmid Vəkilovun Appelyasiya və mətbuata etdiyi şikayətlərdən sonra, eyni zamanda Sizin müvafiq tədbirləriniz nəticəsində həmin süründürməçiliyə son verilsə də, bu dəfə Rəfael Niftəliyev “Rovel Trading” şirkətini sıxışdırmağa başlayıb.Oktyabrın 21-də bizim idxal etdiyimiz 2 maşın akkumlyatorun gömrük bəyannaməsi verildiyi və dövlət rüsumu keçirildiyi halda, R.Niftəliyev bizim malımızı rəsmiləşdirmək istəmir.
Mənim ortağımın Azərbaycan Prezidenti yanında Apellyasiya Şurasına şikayət etməsi Dövlət Gömrük Komitəsi və Enerji Gömrük İdarəsinin rəhbərliyindəki məmurların qəzəbinə səbəb olub. Əvvəla, bu qərəzli münasibət DGK sədrinin müavini Səfər Mehdiyevlə qohum olduğu deyilən Rəfael Niftəliyevin təzyiqlərinə etiraz etdiyimizə görə başladı. O, bizi özünə yaxın sığorta şirkətinə yönəltməyə çalışmasından sonra başladı. Hər bir sahibkardan məcburən 300 manat sığorta pulu alınır. Mən və Həmid Vəkilov məhz Rəfael Niftəliyevin “müəyyən” etdiyi şirkətə sığorta pulu verməkdən imtina etdikdən sonra, R.Niftəliyev bizimlə intriqaya başladı. O, bizim gömrük bəyannamələrimizdə göstərilən “in voice” rəqəmlərinin real qiymətlə düzgün olmadığını boynumuza qoymağa çalışır və idxal etdiyimiz malları rəsmiləşdirməkdən boyun qaçırır. Həmid Vəkilova etdiyi təzyiqlərə son verməyə məcbur qalan Rəfael Niftəliyev son 3 ayda birbaşa şirkəti hədəf götürüb və bizim anbarda olan 2 maşın akkumlyatoru təsdiqləməkdən boyun qaçırır. Enerji Gömrük İdarəsi açıq-aşkar bizdən qisas almağa çalışır. Gömrük Enerji İdarəsinin rəisi Vaqif İbrahimov və maliyyə şöbəsinin rəisi Rəfael Niftəliyev məqsədli şəkildə, anbardakı malların əksəriyyətinin guya yerində olmadığı barədə saxta akt tərtib edib.
Anbarda bir kənardan şəkil çəkərək, guya 2200 akkumlyatordan 1800-ünün yerində olmadığına dair, bizim iştirakımız olmadan saxta akt tərtib ediblər. Bu akta isə özləriylə gətirdikləri “şahid”lər qol çəkiblər. Artıq 3 aya yaxındır ki, biz məhkəmədə çəkişirik. Binəqədi Rayon Məhkəməsi bizə malın dəyərinin 50 faizi qədər cərimə yazdı. Bakı Apellyasiya Məhkəməsi o qətnaməni ləğv edib geri göndərdi, lakin təəssüf ki, Binəqədi Rayon Məhkəməsi yenə də heç bir araşdırma aparmadan, Enerji Görmük İdarəsinin xeyrinə qərar çıxardı. Artıq bir neçə aydır “Rovel Trading” MMC idxal etdiyi akkumlyatorları sata bilmir. Lakin DGK rəsmiləri iddia edirlər ki, guya biz bu malı satmışıq. Məhkəmədə o malların yerində olub-olmadığını araşdırmaq istəmir. Hesab edirəm ki, Vaqif İbrahimov, Rəfael Niftəliyev və onu himayə edən şəxslər Sizin siyasətinizə qarşı gedirlər.
Siz dəfələrlə vurğulamışsınız ki, ölkədə sahibkarların fəaliyyətinə münbit şərait yaradılmalıdır. Bu şəraitin yaranmasına isə ən birinci maneəni sahibkarlara qərəzli yanaşan gömrük məmurları törədir.
Möhtərəm Prezident! Sizdən xahiş edirəm, bu məsələni nəzarətə götürəsiniz və “Rovel Trading” şirkətinə qarşı törədilən süni maneələrin aradan qalxmasına kömək edəsiniz.
Hörmətlə, İntiqam Əlabbas oğlu Həsənov”.
Geri qayıt