Azər Bayramov: Maliyyə Nazirliyinin "Akif Çovdarovu"
10-03-2016, 08:24
Sovet kəşfiyyatçısı olmuş, hazırda isə Amerikanın maliyyə analitiki Yuri Şvets Ukraynanın "Qordon” agentliyinə müsahibəsində maliyyə naziri Samir Şərifovla bağlı səsləndirdiyi ittihamlar ölkə gündəmini ciddi şəkildə silkələyib.
Bu məlumatların xarici mediada tirajlanması hakimiyyət daxilində də ciddi rezonans doğurub. Nazirin 3 ölkənin kəşfiyyat xidmətlərinin agentatura şəbəkəsinə bağlılığı və onlara "işləməsi" ilə bağlı iddialar isə hakim düşərgədə Samir Şərifov və Maliyyə Nazirliyi ilə bağlı ciddi ölçünün götürülməsi zərurətini yaradıb.
Arqument.Az-a daxil olan ilginc məlumata görə, Samir Şərifov keçmiş MTN şefi Eldar Mahmudovun aqibətini yaşa bilər. Ümumilikdə isə nazirlikdəki oliqarxlaşmış məmurların da xaricə uzantıları müzakirə mövzusudur.
Mənbə bildirir ki, Maliyyə Nazirliyində şəbəkələşmiş qrupun korrupsiya mexanizmi barədə bir müddətdir məlumatlar yayılır. Bu korrupsiya şəbəkəsinin başında isə Samir Şərifovun 1-ci müavini Azər Bayramovun dayandığı iddia olunur. Bildirilir ki, nazir müavini vəzifə səlahiyyətlərindən istifadə edərək, dostları, qohumları və yerlilərini şəhər (rayon) maliyyə idarələrinə rəhbər vəzifələrə təyin etdirir. Onun 1 saylı Xəzinədarlıq İdarəsi və bu idarənin rəisi Nadir Qarayev vasitəsiylə necə rüşvət mexanizmi tətbiq etməsi haqda informasiyalar isə medianın gündəmindən düşmür.
Mənbənin sözlərinə görə, hakim elitanın bəzi dairələrində Azər Bayramov "Maliyyə Nazirliyinin Çovdarovu" kimi təqdim edilir. Onun sahibkarlara və dövlət müəssisələrinə qarşı münasibəti isə ciddi narazılıqla qarşılanır. Hətta bir müddət öncə sahibkarlardan biri deyib ki, 1-ci müavin Azər Bayramovun "çətir"i altında xüsusi statusa sahiblənmiş Nadir Qarayev korrupsiya şəbəkəsinə nazirlik və komitələrin maliyyə şöbələrinin rəislərini də cəlb eləyib.
Mediada sahibkarlardan birinin yaydığı məlumatda isə deyilir: "Nadir Qarayev təkcə idarə rəisi və korrupsiya şəbəkəsində önəmli rol oynayan şəxs kimi deyil, həm də Azər Bayramovun yerlisi, yaxın qohumu olaraq nazirlik, komitə, icra hakimiyyətlərinin "qorxulu röyası"dır. Onun bir kəlməsi istənilən nazirliyin maliyyə şöbəsinin müdirini əmrə müntəzir hala gətirir. Əks halda, həmin nazirlik vəsaitlərin vaxtlı-vaxtında köçürülməsində (maliyyəçilərin diliylə desək, hesabların açılması-redaksiya) ciddi sıxıntılar yaşayacaq. Nadir Qarayev yerlisi və əsas himayəçisi olan Azər Bayramova güvənərək, bu təsir imkanından yararlanaraq, ona tapşırılmış "faiz yığmaq" prosesini çox böyük ustalıq və peşəkarlıqla yerinə yetirir. Maliyyə İdarəsinin müdiri Namiq Məmmədov sözün həqiqi mənasında "oliqarx"a çevrilib. Namiq Məmmədov Maliyyə Nazirinin müavini Azər Bayramovla qohumluq münasibətlərindən istifadə edərək büdcə təşkilatlarına ayrılan vəsaitlərdən özünün istədiyi qədər "faiz" alır. Bu barədə saytımıza məlumat verən mənbəninin bildirdiyinə görə maliyyə idarəsinin müdiri büdcə idarələrinə cari və əsaslı təmir, avadanlqılar, digər mal matreallar alınması üçün ayrılan vəsaitlərdən 13 faiz özü üçün tələb edir. Belə ki, idarə və müəssisə rəhbərləri maliyyə idarəsinin müdirinin "payını" nəğd şəkildə əvvəlcədən çatdırırlar. Əks təqdirdə vəsaitin idarə və müəssisələrin hesabına köçürülməsində ciddi «problemlər» ortaya çıxır. Ümumilikdə isə Gədəbəy Maliyyyə İdarəsinin müdirinin illik "gəliri" yüz min manatlarla ölçülür".
İddiaya görə, Maliyyə Nazirliyində şərti adı "Gədəbəy qruplaşması" kimi tanınan Azər Bayramov-Nadir Qarayev birliyi elə vəziyyət yaradıb ki, artıq Samir Şərifovun çevrəsində olanlar da səslərini çıxarmağa başlayıblar. Amma Bayramovun bu işləri Samir Şərifovun göstərişi ilə həyata keçirdiyini iddia edənlər də az deyil: "Bu gün açıq şəkildə "Gədəbəy qruplaşması" və onların himayəsində olan maliyyə məmurlarının hərəkətləri hamını narazı salıb. Çünki məhz bu qrup həmin nazirliklərin dövlət proqrammı çərçivəsində gördükləri işlərin sürətli və keyfiyyətli aparılmasına mane olur. Nadir Qarayev açıq şəkildə "haqq" istəyir. Bu isə həmin nazirlik və komitələrin layihələrini təhlükə altına qoyur. Üstəlik, tələb edilən iri məbləğli "faiz” ödənildiyi halda, işlərin keyfiyyəti istər-istəməz aşağı düşür. Açıq şəkildə tender qalibi olan şirkətlərə "1 saylı Xəzinədarlıq idarəsinin 6 (altı) faizini gətirin, hesabınıza pul köçürülsün" deyirlər. Bəli, «Azər Bayramov-Nadir Qarayevin "pramidası”ı bu şəkildə qurulub, rüşvət elə bu mexanizmlə alınır. Qruplaşma isə bu işlərin arxasında nazirin dayandığını deməkdən belə çəkinmir".
Arqument.Az-a verilən məlumatda iddia olunur ki, Maliyyə Nazirliyinin dövlət qurumlarını, rayonlarda fəaliyyət göstərən müəssisələrin hər üç ildən bir yoxlamaları zamanı da ciddi korrupsiya hallarına yol verilir. Məsələn, bu yoxlamalar zamanı hər bir müəssisədən ən azından 20-30 min manat "haqq" tələb olunur. Buna da göstərişin Azər Bayramov tərəfindən verdildiyi iddia olunur. Bu yoxlamaların qeyri-şəffaf aparılması ilə bağlı sənədlərə əsaslanan xeyli fakt var. Bu faktların da yaxın günlərdə açıqlanması istisna olunmur.
Mənbə iddia edir ki, Maliyyə Nazirliyi də keçmiş MTN-in taleyini yaşaya bilər. Təbii ki, burada təkcə nazir Samir Şərifov deyil, bu qurumda kök salmış qruplaşmlar və ən əsası nazirliyin "Akif Çovdarovu" kimi ad çıxarmış Azər Bayramov da ciddi şəkildə cəzalandırılacaq.
Mövzunu davam etdirəcəyik.
Yazıdakı iddialarla bağlı adıçəkilən şəxslərin də mövqeyini dinləməyə hazırıq.
Geri qayıt