Məhkəmə vəzifəlilərə müqavimət göstərən şəxslə bağlı qərar çıxardı

Ali Məhkəmədə məhkəmə qətnaməsinin icrasına qəsdən mane olmaq və hakimiyyət nümayəndəsinə zor tətbiq etməkdə təqsirləndirilən Azər Qasımovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlqar Cəfərovun sədrliyi ilə keçirilən prosesdə qərar elan olunub.

Qərara əsasən, Şirvan Apellyasiya Məhkəməsinin qərarı ləğv edilib, cinayət işi üzrə yeni apellyasiya baxışı təyin olunub.

İttihama görə, hadisə 23 iyul 2024-cü il tarixli məhkəmə qətnaməsinin icrası zamanı, Lerik rayonu, Aşağı Amburdərə kəndi ərazisində baş verib.

Belə ki, təqsirləndirilən Azər Qasımov Lerik Rayon Məhkəməsinin qətnaməsi ilə Mirhabil İbrahimova (adı, soyadı şərtidir) məxsus 0,87 hektar kənd təsərrüfatı təyinatlı torpaq sahəsinin mülkiyyətçisinə qaytarılması barədə qərarın icrası prosesinə mane olub.

İcra prosesi zamanı İqtisadiyyat Nazirliyi yanında Əmlak Məsələləri Dövlət Xidmətinin 10 saylı Lənkəran Ərazi İdarəsinin yer quruluşu mühəndisi, zərərçəkmiş Ömər Yusifov (adı, soyadı şərtidir) torpaq sahəsinin koordinatlarını dəqiqləşdirmək üçün “GPS” avadanlığından istifadə edərkən, təqsirləndirilən şəxs ona hücum edib sifətinə yumruqla zərbə vurub. Bu zaman zərərçəkmişin dodaq nahiyəsində qançırla nəticələnən, sağlamlığa zərər vurmayan xəsarət yaranıb.

Bundan sonra Azər Qasımov qanunsuz hərəkətlərini davam etdirərək, məhkəmə qərarının icrasını təmin etmək üçün hadisə yerində olan Lerik Rayon İcra və Probasiya Şöbəsinin rəisi zərərçəkmiş Kərəm Mənsurova (adı, soyadı şərtidir) təhkim edilmiş “Chevrolet” markalı xidməti avtomobilə daş atıb. Nəticədə avtomobilin ön şüşəsi və arxa stop işığı zədələnib və 495 manat məbləğində maddi ziyan dəyib.

Beləliklə, təqsirləndirilən şəxs qanuni qüvvəyə minmiş məhkəmə qətnaməsinin icrasına qəsdən mane olmaqla və hakimiyyət nümayəndəsinə zor tətbiq etməklə qanunsuz hərəkətlər törədib.

Lerik Rayon Məhkəməsinin hökmü ilə Azər Qasımov Cinayət Məcəlləsinin 288.2 və 315-cimaddələri ilə nəzərdə tutulan cinayət əməllərini törətməkdə təqsirli bilinib. O, Cinayət Məcəlləsinin 288.2-ci maddəsi ilə 2 500 manat cərimə cəzasına, Cinayət Məcəlləsinin 315-ci maddəsi ilə 3 il müddətinə azadlığın məhdudlaşdırılması cəzasına məhkum edilib. Hökmdən narazı qalan məhkum apellyasiya protesti verib. Şirvan Apellyasiya Məhkəməsinin qərarına əsasən, apelyasiya protesti təmin edilməyib.