Tanışını biznes vədi ilə aldadıb 76 min manatını ələ keçirən şəxs

Şirvan Apellyasiya Məhkəməsində dələduzluqda təqsirləndirilən Ənvər Rəhmanovun (adı, soyadı şərtidir) barəsindəki hökmdən apellyasiya şikayəti üzrə məhkəmə iclası yekunlaşıb.

Pravda.az-ın əldə etdiyi məlumata görə, hakim Yaşar Həşimovun sədrliyi ilə keçirilən prosesdə qərar elan olunub.

Qərara əsasən, apellyasiya şikayətləri təmin edilib, Lənkəran Ağır Cinayətlər Məhkəməsinin hökmü dəyişdirilib, ona şərti cəza verilib. Təqsirləndirilən şəxs barəsində seçilmiş həbs qətimkan tədbiri ləğv edilib və Ənvər Rəhmanov saxlanıldığı Ədliyyə Nazirliyinin Penitensiar Xidmətinin Umbakı Penitensiar Müəssisəsindən dərhal həbsdən azad olunub.

İttihama əsasən, Ənvər Rəhmanov tamah niyyəti ilə özgənin külli miqdarda əmlakını aldatma və etibardan sui-istifadə yolu ilə ələ keçirmək məqsədilə əvvəlcədən vahid niyyət formalaşdırıb.

Belə ki, o, zərərçəkmiş S.S. (adı, soyadı şərtidir) ilə aralarındakı yaxın yoldaşlıq münasibətlərindən irəli gələn etimaddan istifadə edib.

Ənvər Rəhmanov tanışına maliyyə dəstəyi göstərəcəyi təqdirdə Çin Xalq Respublikasından Azərbaycana çilçıraq və divar kağızları gətirərək həmin malların satışı ilə böyük qazanc əldə etməyin mümkün olduğunu bildirib. Bu vədlər həqiqətə uyğun olmayıb. Təqsirləndirilən şəxs zərərçəkmiş şəxsi aldadaraq müxtəlif vaxtlarda ondan pul alıb.

Məlumata görə, 2024-cü ilin noyabr ayının ortalarında Şirvan şəhəri, Z. Hacıyev küçəsində yerləşən “Köhnə bazar” adlanan ərazidə zərərçəkmiş şəxsdən 29 240 manat pul alıb. Bundan sonra həmin ayın ortalarında eyni ünvanda daha 14 000 manat, noyabr ayının sonlarında isə 13 000 manat əldə edib.

Ənvər Rəhmanov 2025-ci ilin yanvar ayının ortalarında yenidən həmin ünvanda zərərçəkmiş şəxsdən 20 000 manat pul alıb.

Beləliklə, o, vahid niyyətlə hərəkət edərək zərərçəkmiş şəxsdən ümumilikdə 76 240 manat pul vəsaiti alıb. Lakin sonradan həmin vəsaiti vəd etdiyi biznes fəaliyyətinə yönəltməyib, şəxsi ehtiyacları üçün sərf edib.

Nəticədə S.S.-ə məxsus 76 240 manat məbləğində külli miqdarda əmlakı etibardan sui-istifadə və aldatma yolu ilə ələ keçirərək dələduzluq etdiyi bildirilir.

Lənkəran Ağır Cinayətlər Məhkəməsinin hökmü ilə Ənvər Rəhmanov Cinayət Məcəlləsinin müvafiq maddəsi ilə nəzərdə tutulmuş cinayət əməlini törətməkdə təqsirli bilinib. Ona 6 il müddətinə azadlıqdan məhrum etmə cəzası təyin edilib. Hökmə əsasən, Təqsirləndirilən şəxs cəzasını ümumi rejimli cəzaçəkmə müəssisəsində çəkməlidir. Hökmdən narazı qalan məhkum apellyasiya şikayəti vermişdi.