Azərbaycanda 7 ay ərzində internetə 383 milyon manat xərclənib

Bu ilin yanvar-iyul aylarında informasiya və rabitə müəssisələri tərəfindən 2 milyard 378,6 milyon manat məbləğində və ya ötən ilin müvafiq dövrü ilə müqayisədə real ifadədə 10,4 faiz çox xidmət göstərilib.
Yeniavaz.com açıqlanan rəsmi məlumatlara istinadən xəbər verir ki, xidmətlərin 742,1 milyon manatını (31,2 faizini) mobil telefon rabitəsi, 383 milyon manatını (16,1 faizini) internet, 379,3 milyon manatını (16 faizini) proqram təminatının işlənməsi və bu sahədə məsləhətlərin verilməsi, 274,2 milyon manatını (11,5 faizini) informasiya, 600 milyon manatını (25,2 faizini) isə digər informasiya və rabitə xidmətləri təşkil edib.
Ötən ilin müvafiq dövrü ilə müqayisədə proqram təminatının işlənməsi və bu sahədə məsləhətlərin verilməsi xidmətləri 34,8 faiz, internet xidmətləri 22 faiz, informasiya xidmətləri 13,2 faiz, mobil telefon rabitəsi xidmətləri 2,9 faiz, digər informasiya və rabitə xidmətləri 4,9 faiz artıb.