Rusiya Zaporojyeyə Şimali Koreya istehsalı ballistik raketlərlə zərbələr endirib

Rusiya Zaporojyeyə Şimali Koreya istehsalı ballistik raketlərlə, “Sirkon” raketləri və KAB-larla zərbələr endirib.

APA xəbər verir ki, bunu Ukrayna Prezidenti Volodimir Zelenski “Telegram” kanalında bildirib.

“Bu, maksimum zərəri məhz mülki infrastruktura vurmaq məqsədilə hesablanmış amansız hücumdur. Təəssüf ki, hazırda şəhərdə 6 nəfərin öldüyü, 19 nəfərin yaralandığı məlumdur”, - Ukrayna lideri qeyd edib.

Zelenksinin sözlərinə görə, Donetsk, Dnepropetrovsk və Nikolayev vilayətlərinə də zərbələr endirilib. Raketlərlə yanaşı, Ukrayna ərazisinə əksəriyyəti reaktiv “Şahed”lər olmaqla 120-dən çox dronla hücum həyata keçirilib.

“Rusiyanın hər bir addımı – ballistik raketlərin istehsalının artırılması, Şimali Koreyanın vasitələrindən istifadə, səfərbərliyə hazırlıq – bütün bunlar göstərir ki, Moskva sülhə deyil, eskalasiyaya hazırlaşır”, - o vurğulayıb.