“Kimlərsə Əli Kərimlidən əzabkeş obraz yaratmağa və siyasi məqsədlər üçün istifadə etməyə çalışır”

“Bu bir texnologiyadır ki, kimisə məsuliyyətdən qurtarmaq üçün ona qarşı guya qeyri-insani rəftar edilməsi barədə şayiələr yayırlar. Bu şayiələrin heç bir əsası yoxdur. Ailəsi ilə danışa bilir, saxlanıldığı şəraitlə bağlı hər hansısa bir şikayət yoxdur”.

Bu sözləri Pravda.az-a açıqlamasında Milli Məclisin deputatı Aydın Mirzəzadə Azərbaycan Xalq Cəbhəsi Partiyasının (AXCP) sədri Əli Kərimliyə qarşı həbsxanada təzyiq edilməsi, ailəsi ilə danışmağa icazənin verilməməsi, ayrı-seçkiliyə məruz qalması ilə bağlı yayılan iddialara münasibət bildirərkən deyib.

A.Mirzəzadənin sözlərinə görə, vaxtaşırı QHT, insan hüquqlarını müdafiə strukturları yoxlanış keçirirlər və onları dinləyirlər: “İstintaq işi gedir. Şübhəsiz ki, məhkəmədə ona qarşı irəli sürülən ittihamlar və onun təsdiqi məsələləri ortada olacaq. Şübhəsiz ki, kimlərsə bu gün Əli Kərimlidən əzabkeş obraz yaratmağa və ondan siyasi məqsədlər üçün istifadə etməyə çalışır. Bu, birinci dəfə deyil. İndiyə qədər də olub. Köhnə texnologiyanı yeni formatda cəmiyyətin düşüncəsinə yeritməyə çalışırlar. Hesab edirəm ki, Əli Kərimli və onun kimilər ilk olaraq istintaqın suallarına cavab versinlər, onlara qarşı irəli sürülən ittihamlardakı məsələlərə aydınlıq gətirsin”.

Xatırlatma: Ə.Kərimli Prezident Administrasiyasının sabiq rəhbəri, hazırda ev dustaqlığında saxlanılan Ramiz Mehdiyevin cinayət işi üzrə istintaqa cəlb edilib.