Azərbaycanlıların olduğu növbəti gəmiyə

Qara dənizdə Odessa limanı yaxınlığında göyərtəsində azərbaycanlı dənizçilərin olduğu quru yük gəmisi dron hücumuna məruz qalıb.

"Azərbaycan Dənizçilərinə Dəstək" İctimai Birliyindən Modern.az-a verilən məlumata görə, hadisə bu gün səhər saatlarında qeydə alınıb.

Panama bayrağı altında üzən və "Albatros Corporation" şirkətinə məxsus olan "ATA -2" adlı quru yük gəmisinə 3 pilotsuz uçuş aparatı (PUA) ilə hücum edilib.

Zərbələr nəticəsində gəmiyə ciddi ziyan dəyib. Qeyd olunub ki, gəminin heyəti 13 nəfərdən ibarətdir. Onlardan 12 nəfəri Azərbaycan, 1 nəfəri isə Türkiyə vətəndaşı olan dənizçilərdir.

Hücum zamanı xəsarət alan və ya həyatını itirən olmayıb. Hazırda gəmi heyəti təhlükəsizlik məqsədilə Rumıniyanın Sulina şəhərindədir.