“Avropa ölkələri bu miqyasda istilərə tam hazır deyildilər”

“Avropa ölkələrində müşahidə olunan rekord istilər bir daha göstərir ki, iqlim dəyişikliyi artıq gələcəyin deyil, bu günün problemidir. Son günlər bir sıra ölkələrdə yüksək temperatur nəticəsində insanların həyatını itirməsi narahatlıq doğuran faktdır və ilk növbədə həmin ailələrə başsağlığı düşür. Burada bir məqamı da nəzərə almaq lazımdır ki, Avropanın əksər ölkələrində ənənəvi olaraq iqlim daha mülayim və sərin olub. Uzun illər ərzində nə yaşayış binalarında, nə də bir çox ictimai müəssisələrdə, o cümlədən bəzi xəstəxanalarda geniş şəkildə kondisioner sistemlərindən istifadə edilməyib. Çünki buna ciddi ehtiyac yaranmırdı. Məhz buna görə son illərdə müşahidə olunan kəskin istilər həmin ölkələrin infrastrukturunu və səhiyyə sistemini yeni çağırışlarla üz-üzə qoyub. Onlar bu miqyasda istilərə tam hazır deyildilər”.

Bu sözləri Pravda.az-a açıqlamasında Milli Məclisin deputat Razi Nurullayev deyib.

Deputat bildirib ki, Azərbaycan coğrafi mövqeyinə və iqlim xüsusiyyətlərinə görə uzun illərdir, yüksək temperatur şəraitində yaşayır: “Buna uyğun olaraq yaşayış binalarında, dövlət müəssisələrində, xəstəxanalarda və digər obyektlərdə soyutma sistemlərindən istifadə daha geniş yayılıb. Bu baxımdan, ölkəmiz isti hava dalğalarına müəyyən mənada daha uyğunlaşmış infrastruktura malikdir. Bununla yanaşı, belə hadisələrdən siyasi müqayisələr aparmaq doğru yanaşma olmaz. Çünki iqlim dəyişikliyi bütün dövlətlər üçün ortaq təhlükədir. Bu gün Avropanın üzləşdiyi problem sabah başqa regionlarda da yaşana bilər. Əsas məsələ dövlətlərin ekstremal hava şəraitinə uyğunlaşma tədbirlərini gücləndirməsi, erkən xəbərdarlıq sistemlərini inkişaf etdirməsi və xüsusilə yaşlı insanların, uşaqların və xroniki xəstələrin qorunmasına daha çox diqqət yetirməsidir. Eyni zamanda bu hadisələr onu da göstərir ki, bütün dövlətlər bir-birinin təcrübəsindən faydalanmalı və iqlim dəyişikliklərinin yaratdığı risklərə qarşı daha sıx əməkdaşlıq etməlidirlər”.