Qaziyə qarşı dələduzluq edən MMC rəhbərləri yenidən

"AZ İNTEKST" MMC-nin direktoru Ruhəddin Cabbarov, işçiləri Sənan Quliyev və Telman Fətəliyevin barəsindəki qərardan kassasiya şikayəti verilib.

Pravda.az-ın əldə etdiyi məlumata görə, şikayət Ali Məhkəmənin hakimi Şahin Yusifovun sədrliyi ilə araşdırılacaq.

Qeyd: Təqsirləndirilən şəxslər vətəndaşların evlərini təmir etmək adı ilə onları aldadıb, külli miqdarda pullarını ələ keçiriblər.

İstintaq orqanı tərəfindən təqsirləndirilən şəxslərin barəsində Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmək) maddəsi ilə ittiham elan edilib.

Cinayət işi üzrə 28 nəfər zərərçəkmiş qismində tanınıb.

Zərərşəkmiş şəxslərdən biri - Əli Nuriyev birinci Qarabağ Müharibəsinin qazisi, ehtiyatda olan baş leytenantdır. O, Nərimanov rayonunda, Koroğlu Rəhimov küçəsi 1-də yerləşən mənzilini təmir etdirmək məqsədi ilə 2021-ci ilin iyunun 11-də özünü "AZ İNTEKST" MMC-nin direktoru kimi təqdim edən Cabbarov Ruhəddin Rasim oğlu ilə müqavilə bağlayıb. Pulu ödəsə də, işi görülməyib.

Bakı Ağır Cinayətlər Məhkəməsinin hökmü ilə Sənan Quliyevə 7 il 9 ay 19 gün, Telman Fətəliyevə 5 il 5 ay 20 gün və Ruhəddin Cabbarova 2 il 11 ay 25 gün müddətinə azadlıqdan məhrum etmə cəzası təyin edilib. Telman Fətəliyev və Ruhəddin Cabbarov barəsində seçilmiş polis nəzarətinə verilmə qətimkan tədbiri həbs qətimkan tədbiri ilə əvəzlənib və onlar məhkəmə zalında həbs olunublar. Dəymiş ziyanın ödənilməsi üçün hər üç şəxsdən müəyyən məbləğlər tutulacağı elan olunub.