Əmisi oğlunu onun arvadı ilə bağlı xoşagəlməz söz dediyinə görə bıçaqladı

Gəncə Ağır Cinayətlər Məhkəməsində qəsdən sağlamlığa ağır zərə vurmada təqsirləndirilən Əlövsət İmanovun (soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Elşən Vəliyevin sədrliyi ilə keçirilən prosesdə hökm oxunub.

Məhkəmənin hökmü o, 3 il 6 ay müddətə azadlıqdan məhrum edilib.

İttihama görə, təqsirləndirilən şəxs 2025-ci il tarixdə, saat 18 radələrində Şəmkir rayonu, Təzəkənd kəndində əmisi oğlu, zərərçəkmiş Əbülfəz İmanovun (soyadı şərtidir) yaşadığı evin həyətində yerləşən yardımçı tikilidə olarkən şəxsi münasibətlər zəminində baş vermiş mübahisə nəticəsində ağır cinayət əməli törədib.

Hadisə zamanı Əlövsət alkoqol sərxoşluğu vəziyyətində olub. Mübahisəyə səbəb isə zərərçəkmiş şəxsin onun Gəncə şəhərində yaşayan arvadı barədə irəli sürdüyü iddialar olub. Tərəflər arasında yaranmış sözlü mübahisə daha sonra fiziki qarşıdurmaya çevrilib.

İlkin olaraq Əbülfəz təqsirləndirilən şəxsi yumruqla çiyin və boyun nahiyəsindən vuraraq, həmçinin kəllə ilə dodaq nahiyəsinə zərbə endirərək ona fiziki ağrı yetirib. Bundan sonra Əlövsət qisas alma niyyəti ilə hərəkət edərək qarşı tərəfə hücum edib. O, əvvəlcə əlləri ilə zərərçəkmiş şəxsin üz nahiyəsinə – göz ətrafı yumşaq toxumalara zərbələr endirib, nəticədə qançırlarla müşayiət olunan xəsarətlər yetirib. Daha sonra isə stol üzərindən götürdüyü, soyuq silah hesab edilməyən, lakin kəsici və deşici xassəyə malik mətbəx bıçağından istifadə edib.

Təqsirləndirilən şəxs həmin bıçaqla Əbülfəzin bədəninin müxtəlif nahiyələrinə üç dəfə zərbə vurub. Nəticədə zərərçəkmiş şəxs ağır və həyat üçün təhlükəli xəsarətlər alıb.

Beləliklə, təqsirləndirilən şəxsin əməli qisas motivi ilə törədilmiş qəsdən sağlamlığa ağır zərər vurma cinayəti kimi xarakterizə olunub.