Sumqayıtda övladını dənizdə boğaraq öldürən Türkiyə vətəndaşının kassasiya şikayətində

Ali Məhkəmədə Sumqayıtda azyaşlı övladını qəsdən öldürməkdə təqsirləndirilən Türkiyə vətəndaşı Ahmet Yeşilin barəsindəki qərardan verilən kassasiya şikayətinin bəzi detalları məlum olub.

"DİA-AZ" pravdaaz-a istinadən xəbər verir ki, hakim Ələsgər Novruzovun sədrliyi ilə keçirilən prosesdə elan olunub ki, məhkum şikayətində barəsində olan cinayət işinə düzgün baxılmasını və Sumqayıt Apellyasiya Məhkəməsinin Cinayət Kollegiyasının 28 yanvar 2025-ci il tarixli qərarının təkrarən araşdırılmasını xahiş edir.

Kassasiya instansiyası məhkəməsində Mmüdafiəçi çıxış edərək, Ahmet Yeşilin psixoloji vəziyyətinin normal olmadığını, bunun hadisədən əvvəlki davranışlarla da sübuta yetirildiyini, etdiyi hərəkətin nəticəsini dərk etmədiyini bildirib, verilmiş kassasiya şikayətinin təmin edilməsini xahiş edib.

Baş Prokurorluğunun Dövlət ittihamının müdafiəsi üzrə idarəsinin Kassasiya instansiyası məhkəməsində dövlət ittihamının müdafiəsi və analitik təhlil şöbəsinin prokuroru çıxış edərək, kassasiya şikayətinin təmin edilməməsini və Sumqayıt Apellyasiya Məhkəməsinin qərarının dəyişdirilmədən saxlanılmasını xahiş edib.

Qərara əsasən, şikayət təmin edilməyib.

Qeyd: 2024-cü il martın 31-də Sumqayıt şəhəri ərazisində dəniz sahilində uşaq meyitinin aşkar edilib. Araşdırmalarla 1984-cü il təvəllüdlü Yeşil Ahmet Turanın Sumqayıt şəhəri Zeynalabdin Tağıyev qəsəbəsi ərazisində azyaşlı övladını suda boğaraq qəsdən öldürməsinə əsaslı şübhələr müəyyən edilib. Faktla bağlı Sumqayıt şəhər prokurorluğunda Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə) maddəsi ilə cinayət işi başlanıb, Yeşil Ahmet Turan prokurorluğun qərarı ilə iş üzrə şübhəli şəxs qismində tutulub.

Sumqayıt Ağır Cinayətlər Məhkəməsinin hökmü ilə Ahmet Yeşil 20 il müddətinə azadlıqdan məhrum olunub. Sumqayıt Apellyasiya Məhkəməsinin qərarına əsasən, apellyasiya şikayəti təmin edilməyib.