“Ramiz Mehdiyevin cinayət işi məsələsində xalqla dövlətin mövqeyi üst-üstə düşür”

“Ramiz Mehdiyevin cinayət işi çərçivəsində ortaya çıxan faktlara və Əli Kərimlinin iştirakı barədə məlumatlara Azərbaycan ictimaiyyətinin reaksiyası onu deməyə əsas verir ki, cəmiyyət dövlətinə xəyanət etmiş şəxslərin cəzalandırılmasını gözləyirmiş və dövlətinin maraqlarını kənar ölkəyə satan insanlar barədə qanuni ölçü götürmək həm də bir ictimai sosial sifariş idi”.

Bu barədə Milli Məclisin deputatı Aydın Hüseynov Musavat.com-a açıqlamasında bildirib. Deputat qeyd edib ki, sosial şəbəkələri, medianı izlədikdə, sadə insanların fikirlərini öyrəndikdə Dövlət Təhlükəsizlik Xidmətinin xəyanətkar şəbəkəni nəzarət altına alması addımını və cinayət işi açılıb istintaqın başladılmasını ictimaiyyətin alqışladığını görməmək mümkün deyil: “Ramiz Mehdiyevin cinayət işi çərçivəsində ortaya çıxan faktlar, xüsusən də Milyarderlər İttifaqı və Milli Şura adlanan qurumların, əslində, hansı məqsədlərlə yaradılması cəmiyyətə aydın olduqca indi atılan hüquqi addımların dövlətimiz və ictimaiyyət üçün son dərəcədə böyük əhəmiyyət daşıdığını görə bilərik. Elə buna görə də ictimaiyyət Ramiz Mehdiyevin cinayət işi çərçivəsində həyata keçirilən hüquqi tədbirləri dəstəkləyir, bu addımların dövlət maraqlarımız, ictimai maraqlar üçün ciddi əhəmiyyət daşıdığını nümayiş etdirir”.

A.Hüseynovun sözlərinə görə, dövlətin mövqeyi, məsələlərə “kimliyindən, hansı vəzifədə işləməsindən, hansı status daşımasından asılı olmayaraq milli maraqları satanlara qarşı güzəşt ola bilməz” münasibəti ortadadır: “Xalqımız və ictimaiyyət də vətənin maraqlarını hakimiyyətə gəlmək məqsədinə qurban verməyə hazır olanlara, milli maraqları kənar qüvvələrin maraqlarına satmaq istəyənlərə qanunun sərt üzünün tətbiq olunmasının tərəfdarıdır. Ona görə də əminliklə söyləyə bilərəm ki, bu məsələlərdə dövlətlə xalqımızın münasibəti, mövqeyi tamamilə üst-üstə düşür”.