Qadını aldadıb, tanışını rüsvayedici videolarla şantaj edən şəxsə cəza verildi

Lənkəran Ağır Cinayətlər Məhkəməsində hədə-qorxu ilə tələb etmədə təqsirləndirilən Cəfər Bayramovun (adı, soyadı şərtidir) cinayət işi üzrə məhkəmə iclası başa çatıb.

Pravda.az-ın etdiyi məlumata görə, hakim Ənnağı Məmmədlinin sədrliyi ilə keçirilən prosesdə hökm oxunub.

Məhkəmənin hökmü ilə o, cəzasını ciddi rejimli cəzaçəkmə müəssisəsində çəkməklə 7 il 6 ay müddətə azadlıqdan məhrum edilib.

İttihama görə, Cəfər Bayramov 2025-ci ilin mart ayında etibardan sui-istifadə etmə və aldatma yolu ilə Lənkəran rayonunda tanışı olan Cəmilə Vəliyevanı (adı, soyadı şərtidir) aldadaraq, ona guya hüquq-mühafizə orqanları əməkdaşlarının onların münasibətindən xəbərdar olduqlarını və ailə üzvləri arasında rüsvay olacaqlarını bildirib, qorxu hissi yaratmaqla həmin şəxsdən adına kredit götürməsini xahiş edib. Təqsirləndirilən şəxs qadına kredit məbləğini özünün qaytaracağına dair yalan vədlər verərək, onun etibarından sui-istifadə edib. Nəticədə zərərçəkmişin bankdan aldığı 1400 manat məbləğində pulu ələ keçirib, şəxsi məqsədlərinə xərcləyib.

Bundan başqa, Cəfər Bayramov eyni ilin mart ayının sonunda digər tanışını Arif Ələkbərova (adı, soyadı şərtidir) qarşı hədə-qorxu ilə pul tələb etmək niyyətinə düşüb. O, Arifin guya çəkilmiş rüsvayedici videomateriallarının özündə olduğunu deyərək, həmin görüntüləri sosial şəbəkələrdə yaymaqla hədələyib və bu yolla ondan əvvəlcə 2000 manat, daha sonra isə təkrarən 250 və 200 manat məbləğlərində pul tələb edərək ələ keçirib.

Beləliklə, təqsirləndirilən şəxs müxtəlif şəxslərə hədə-qorxu yolu ilə ümumilikdə 2850 manat məbləğində vəsaiti ələ keçirib.

Qeyd: Cəfər Bayramov daha əvvəl məhkumluq həyatı yaşayıb.