On bir il əvvəl arvadını öldürdü, həbsdən çıxıb onunla münasibətlərindən şübhələndiyi kişini qətlə yetirdi

Sumqayıt Apellyasiya Məhkəməsində qəsdən adam öldürmədə təqsirləndirilən Eynulla Musayevin barəsindəki hökmdən verilən apellyasiya şikayətinə baxılıb.

Pravda.az-ın əldə etdiyi məlumata görə, hakim Rəşadət Ağayevin sədrliyi ilə keçirilən prosesdə qərar elan olunub.

Məhkəmənin qərarına əsasən, apellyasiya şikayəti təmin edilməyib.

İttihama görə, 1974-cü il təvəllüdlü Eynulla Musayev Cinayət Məcəlləsinin 120.2.2-ci (qəsdən adam öldürmə), 120.2.4, 120.2.9 və 157.1-ci maddələri ilə təqsirli bilinərək məhkum olunub Məhkəmə istintaqı zamanı müəyyən edilib ki, təqsirləndirilən şəxs əvvəllər Bakı Ağır Cinayətlər Məhkəməsinin 04 dekabr 2013-cü il tarixli hökmü ilə 120.1-ci maddə ilə təqsirli bilinərək 9 il azadlıqdan məhrumedilmə cəzasına məhkum olunub, 27 aprel 2022-ci il tarixli qərarla şərti olaraq vaxtından əvvəl azad edilib.

Belə ki, təqsirləndirilən şəxs keçmiş arvadı ilə münasibətlərini bəhanə edib həmkəndlisi, 57 yaşlı, zərərçəkmiş Akif Qəribovu öldürmək qərarına gəlib. O, 12 oktyabr 2024-cü il tarixdə, saat 21 radələrində Xaçmaz rayonu, Köhnə Xaçmaz kəndində yerləşən fərdi yaşayış evinə qanunsuz daxil olub, zərərçəkmişin müdafiə olunmağa qadir olmadığı vəziyyətdə baş və bədən nahiyəsinə bir neçə dəfə yumruq zərbələri vurub.

Eynulla Musayevin bu hərəkətləri nəticəsində Akif Qəribov komaya düşüb, nəticədə ölüb.

Sumqayıt Ağır Cinayətlər Məhkəməsinin hökmü ilə o, 17 il müddətinə azadlıqdan məhrum edilib.

Qeyd: Eynulla Musayev 2013-cü ildə həyat yoldaşı 38 yaşlı Şərqiyyə Musayevanın başını kəsərək qətlə yetirmişdi.