"Hicabın məcburi xarakter alması öz qüvvəsini itirib"

Milli Məclisin İctimai birliklər və dini qurumlar komitəsinin üzvü Ceyhun Məmmədov İranda hicabla bağlı məhdudiyyətlərin aradan qalxması fonunda hicabın məcburi şəkildə taxılmasının insan hüquqlarına zidd kimi dəyələndirilməsinə münasibət bildirib.

Deputat Pravda.az-a açıqlamasında deyib ki, İran şəriət dövlətidir və orada bütün ictimai münasibətlər şəriət qaydaları əsasında tənzimlənir.

“Uzun müddət İranda hicab taxmaq vacib idi. Bu gün də İran qanunlarına əsasən, hicab taxmaq vacibdir. Sadəcə hazırda İran tərəfi cəmiyyətdəki gərginliyi nəzərə alaraq hicabla bağlı məsələdə müəyyən yumşalmaya getdi. Hicabın məcburi xarakter alması öz qüvvəsini itirdi. Buna görə də bu gün İranda qadınların sərbəst şəkildə hicabsız hərəkət etdiklərini görürük. Məsələyə bu nöqteyi-nəzərdən yanaşmaq lazımdır. Hicab insanların öz istəyinə buraxılmalıdır. Kim istəyirsə, hicab taxmalıdır, kim istəmirsə, taxmaya bilər. Düzgün, sağlam yanaşma da budur. Bu, İranın öz daxili işidir və daxili formada qəbul edilmiş qaydadır. Söhbət məcburiyyətdən daha çox İranda hansı qanunların işləməsindən gedir. Qanun pozuntusu o zaman ola bilərdi ki, hansısa formada hicaba qadağa qoyulsun, yaxud məhdudiyyət qoyulsun. Hazırda məhdudiyyət aradan qaldırılıb. İnsanlara rahatlıq, sərbəstlik verilib. Uzun müddətdir, cəmiyyətin də gözləntiləri bu idi”, - deputat bildirib.