Kremlin yeni iddiası: "Rusiya ordusu ABŞ-dan da güclüdür"
Bu gün, 16:05
Rusiya prezidentinin köməkçisi və Dəniz Kollegiyasının sədri Nikolay Patruşev dövlət televiziyasında iddia edib ki, Rusiya ordusu dünyanın ən güclü silahlı qüvvələridir və ABŞ da daxil olmaqla heç bir ölkə onunla müqayisə oluna bilməz.
Moderator.az xəbər verir ki, bu barədə "gazeta.ru" nəşri yazıb.
"Biz hamıdan güclüyük"
Patruşevin sözlərinə görə, "hərbçilər yaxşı bilir ki, biz indi hərbi baxımdan istənilən dövlətdən üstünük. ABŞ-ı çoxları ən güclü ordu hesab edir, amma bu, belə deyil. Bizim ordumuz daha güclüdür və cavab verməyə qadirdir". Patruşev əlavə edib ki, yalnız ordunun gücü ilə bütün Avropanın "təcavüzünü" saxlamaq mümkün deyil, daxildəki dəstək həlledici əhəmiyyət kəsb edir.
Trampın "kağız pələng" bənzətməsi
ABŞ prezidenti Donald Tramp bundan öncə Rusiyanı məsxərəyə qoyaraq bildirib ki, Rusiya ordusunun real gücü şübhə doğurur. O, xatırladıb ki, Moskva artıq üç ildən çoxdur Ukraynada müharibə aparır, halbuki "həqiqi gücə malik dövlət belə müharibəni bir həftədən az müddətdə bitirərdi".
Tramp Rusiyanı "kağız pələng" adlandıraraq qeyd edib ki, Avropa İttifaqının dəstəyi ilə Ukrayna öz ərazilərini geri qaytara bilər. Bu qiymətləndirmə ilə Rusiya tərəfindən məhkum edilmiş sabiq komandir, hərbi cani İqor Girkin də razılaşıb. O, "üç ildən çox kiçik bir ölkəyə qarşı uğursuz müharibə aparmaq" faktını Rusiya ordusunun zəifliyi kimi dəyərləndirib.
Orduya yeni çağırışlar və artan say
Patruşevin bəyanatı ilə eyni günlərdə Rusiyada payız çağırışı başlayıb. Bu, son doqquz ilin ən genişmiqyaslı səfərbərliyi sayılır. Cari ildə 135 min nəfərin hərbi xidmətə göndərilməsi planlaşdırılır. 2024-cü ildə Putin ordu heyətinin sayını 2,3 milyona çatdırmaq barədə fərman imzalayıb. Bunun 1,5 milyonu hərbi qulluqçulardan ibarət olacaq. Kreml bunu "Rusiyanın sərhədləri boyunca artan təhdidlər" ilə izah edir.
Hərbi ritorika və reallıq arasındakı uçurum
Kremlin iddialı bəyanatları fonunda Ukraynada davam edən müharibə əksini göstərir: Rusiya ordusu böyük itkilər versə də, qələbə qazana bilmir. Moskva daxili səfərbərlik və təbliğatla öz gücünü nümayiş etdirməyə çalışsa da, həm Qərb, həm də Rusiya daxilindəki bəzi səsli fiqurlar bu iddiaları inandırıcı hesab etmir. Rusiya ordusu haqqında "dünyanın ən güclüsü" ritorikası Kremlin daxili auditoriyaya yönəlmiş təbliğat xətti olsa da, müharibə reallığı onun imkanlarının ciddi şəkildə şişirdildiyini göstərir.
Geri qayıt