Vətən müharibəsi iştirakçısını bıçaqlayan şəxslə bağlı

Ali Məhkəmədə Ağdam rayonunda həmyerlisini bıçaqlamaqda təqsirləndirilən Ələkbər Ələkbərovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, 07 iyul 2022-ci il tarixdə, saat 21 radələrində Ağdam rayon Xındirstan kəndi ərazisində yerləşən rayon polis şöbəsinin inzibati binasında qeydə alınıb.

Belə ki, rayonun Quzanlı qəsəbəsinin sakini, 1998-ci il təvəllüdlü Hökmdar Daşdəmirov bacısının ayrıldığı nişanlısı Əli Ələkbərovla dava edib. Daha sonra hər iki şəxs polisə dəvət olunub.

Şöbədə olan zaman Əli Ələkbərovun qardaşı Ələkbər üzərində gəzdirdiyi bıçaqla Hökmdar Daşdəmirovu vuraraq ona xəsarət yetirib. Ələkbər Ələkbərov polis əməkdaşları tərəfindən saxlanılıb.

Gəncə Ağır Cinayətlər Məhkəməsinin hökmü ilə o, 4 il 6 ay müddətinə azadlıqdan məhrum edilib. Hökmdən narazı qalan dövlət ittihamçısı apellyasiya protesti və zərərçəkmiş apellyasiya şikayəti verib. Gəncə Apellyasiya Məhkəməsinin qərarına əsasən, protest və şikayət qismən təmin edilib, Gəncə Ağır Cinayətlər Məhkəməsinin çıxardığı 4 il 6 ay hökmü ləğv olunub. Təqsirləndirilən şəxs Cinayət Məcəlləsinin 29,120.1-ci (qəsdən adam öldürməyə cəhd) və 221.3-cü (xuliqanlıq) maddələri ilə təqsirli bilinib və ona 10 il 6 ay müddətinə azadlıqdan məhrumetmə cəzası təyin edilib.

Xatırlatma: Hökmdar Daşdəmirov Vətən müharibəsi iştirakçısdır.