Bakını hədəf seçən qüvvə hərəkətə keçib

Xəbər verdiyimiz kimi, 28 avqustda Ukraynanın paytaxtı Kiyev şəhərinə raket və dron hücumları olub. Raketlərdən birinin ölkəmizin Ukraynadakı səfirliyinin binasının yaxınlığında partlaması nəticəsində binaya zərər dəyib. Xarici İşlər Nazirliyinin mətbuat katibi Ayxan Hacızadə bildirib ki, bəzi pəncərələr qırılıb, konsulluq bölməsinin damında çatlar əmələ gəlib. “Səfirliyin əməkdaşları arasında xəsarət alan olmayıb. Səfirliyimiz fəaliyyətini davam etdirir”, – XİN rəsmisi vurğulayıb.

Bu, Bakıya xəbərdarlıq və ya təzyiq atəşi hesab oluna bilərmi?

Globalinfo.az-a danışan politoloq Ramiyə Məmmədova deyib ki, Rusiya Ukrayna ilə müharibə aparır və tərəflərin bir-birinə endirdiyi zərbələrin konkret yerini müəyyən etmək mümkün deyil:

“Yəni istər səfirliyimizin binasına, istərsə də SOCAR-ın boru kəmərlərinə dəyən zərbələr haradasa başadüşüləndir. Hesab edirəm ki, bu kimi insidentlərdən xüsusi məna çıxarmağın əhəmiyyəti yoxdur. O ki qaldı Rusiya–Azərbaycan münasibətlərinə – bəli, təəssüf ki, münasibətlər həddindən artıq gərgindir. Gərginliyin artmasında xarici ölkələr də səy göstərirlər.

Əlbəttə, gərginliyin başlamasında Rusiya tərəfi açıq şəkildə günahkardır. Üstəlik, təyyarəmizin vurulmasından sonra Kremlin üzr istəməməsi və prosesləri daha da gərginləşdirməsi mövcud vəziyyəti yaradıb. Bu gün azərbaycanlılar Rusiyada sıxışdırılır, diskriminasiyaya məruz qalır”.

Politoloq qeyd edib ki, bu gün Rusiyada siyasətə yön verən bir neçə qüvvə var:

“Əslində, Putin bu qüvvələrin heç də hamısına nəzarət edə bilmir. Bunu ölkə kanallarında gedən diskussiya və müzakirələrdən görmək mümkündür. Lakin Rusiya anlamalıdır ki, gücünü və müttəfiqlərini itirir. Buna görə də gərginliyi azaldacaq addımlar atılmalıdır. İki ölkənin münasibətlərindəki bu gərginlik xarici qüvvələrə sərf edir.

O ki qaldı görüləcək tədbirlərə, dediyim kimi, müharibə zamanı zərbələrin endirildiyi yerləri müəyyən etmək çətindir və bu səbəbdən səfirliklərin və ya strateji məntəqələrin zərər görməsi halları olur. Əlbəttə, Rusiya daha diqqətli olmalıdır, amma bənzər insidentlər Kiyevdən də gələ bilər”.