Onlar müharibəni dayandırmağa hazır deyillər

Almaniya kansleri Fridrix Merz Ukrayna Prezidenti Volodimir Zelenski ilə Rusiya Prezidenti Vladimir Putin arasında görüşün yaxın gələcəkdə baş tutmayacağını bildirib. “Politico” xəbər verir ki, o bu fikirləri Fransa Prezidenti Emmanuel Makronla birgə keçirdiyi brifinqdə deyib.

“ABŞ Prezidenti Donald Tramp və Putinin daha əvvəl əldə etdiyi razılaşmaya baxmayaraq, Zelenski ilə Putin arasında açıq heç bir danışıqlar olmayacaq”, - Almaniya kansleri vurğulayıb.

Merzin bəyanatı Rusiyanın avqustun 28-nə keçən gecə Kiyevdəki mülki hədəflərə yeni zərbələr endirməsi fonunda səslənib.Ukrayna hakimiyyətinin bildirdiyinə görə, Rusiya hücum pilotsuz təyyarələri, qanadlı raketlər və ballistik raketlərdən istifadə edib. Şəhərin hərbi idarəsi azı dördü uşaq olmaqla 19 nəfərin öldüyünü bildirib. Uşaqlar da daxil olmaqla onlarla mülki şəxs yaralanıb. Paytaxtın bütün ərazilərində dağıntılar qeydə alınıb. Darnitski rayonunda raket beşmərtəbəli binaya düşüb və girişlərdən birini tamamilə sıradan çıxarıb.

Ağ Evin mətbuat katibi Karolayn Levitt Rusiyanın Kiyevə hücumunu şərh edərkən deyib ki, Zelenski və Putin özləri müharibəni dayandırmağa “hələ hazır deyillər”. Onun sözlərinə görə, Tramp hərbi əməliyyatları dayandırmağa çalışır, lakin “Putin və Zelenski də bunu istəyir?”.

Danışıqlar mövzusu avqustun ortalarından fəal şəkildə müzakirə olunur. Tramp avqustun 15-də Ankoricdə Putinlə görüşüb və bildirib ki, onun diplomatik təşəbbüsünün məqsədlərindən biri Ukraynanın iştirakı ilə üçtərəfli formatda danışıqlar təşkil etməkdir. Lakin bir həftə sonra Amerika lideri etiraf edib ki, Putin Ukrayna Prezidentini “sevmir” deyə, Zelenski ilə birbaşa əlaqə saxlamaqdan imtina edir.

Moskva da öz növbəsində əlavə şərtlər qoyub. Rusiyanın xarici işlər naziri Sergey Lavrov izah edib ki, görüş yalnız gündəliyin “ətraflı işlənməsi”ndən sonra mümkündür.

Kiyev danışıqların pozulmasında Kremli günahlandırıb.

"Ukrayna danışıqlardan çəkinmir və istənilən formatda danışıqlara hazırdır. Biz tərəfdaşlarımızın Moskvadan ən azı minimal konstruktiv mövqe əldə etməkdə bizə kömək edəcəklərini gözləyirik", - deyə Zelenski vurğulayıb və əlavə edib ki, Rusiya mümkün görüşlə bağlı "mənfi siqnallar göndərir".

Avqustun 26-da Fridrix Merz qeyd edib ki, Zelenski və Putinin iştirakı ilə aparılan danışıqlar uğursuz olarsa, Qərb Moskvaya qarşı yeni təzyiq tədbirlərini nəzərdən keçirməyə məcbur olacaq. O həmçinin xatırladıb ki, bu yaxınlarda Vaşinqtona səfəri zamanı Ukrayna Prezidenti istənilən vaxt danışıqlar masası arxasına əyləşməyə hazır olduğunu təsdiqləyib.

Politoloq Azər Qasımov da hesab edir ki, Putin və Zelenski arasında görüş mümkünsüz görünür.

“Tərəflərin danışıqlara hazır olması və bundan imtina etməmələri görüntü yaratmaqdan başqa bir şey deyil. Hər iki tərəf yaxşı bilir ki, həvəssiz görüşlərin nəticəsi olmayacaq. Rusiya və Ukrayna öz istəklərini, şərtlərini yaxşı bilir və bunu qarşı tərəfin qəbul etməyəcəyini də gözəl anlayır. Sadəcə, Kiyev də, Moskva da dünya ictimaiyyətinin nəzərində müharibə tərəfdarı kimi görünmək istəmirlər. Rusiyanın Kiyevə son hücumu isə demək olar ki, görüş ehtimalını sıfıra endirdi”, - analitik AYNA.AZ-a şərhində bildirib.

Qasımov qeyd edib ki, Kiyevin niyyəti ərazilərini işğaldan azad etməkdir: “Rusiya isə işğalçılıq hərəkətinə qanuni don geyindirmək istəyir və vaxt qazanır. Kreml bu tərəfdən danışıqlara hazır olduğunu bəyan etsə də, digər tərəfdən Kiyevi bombalayır, mülki əhalini atəşə tutur. Bu halda görüş, sülh danışıqları mümkün görünmür”.

“Zelenski ilə Putin arasında birbaşa görüşün baş tutması münaqişənin dinc yolla həllinə yönəlik diplomatik səylərin zirvəsi kimi qiymətləndirilir. Belə görüşlər beynəlxalq münasibətlərdə gərginliklərin yumşaldılması və sülh proseslərinin irəliləməsi üçün vacib addım hesab olunur. Alyaskada Trampla Putin arasında keçirilən görüşdən sonra bu istiqamətdə müzakirələr aparıldı. Lakin sonradan Rusiya rəsmiləri Prezident Putinin belə bir görüşdə iştirak planının olmadığını bəyan etdi. Üstəlik, dünən Kiyev yenidən bombalandı. Ukrayna tərəfi əvvl görüşdə maraqlı olduğunu desə də, dünəndən ritorika dəyişib. Bu mənada, görüşün alınacağını zənn etmirəm”. Bu sözləri isə politoloq İlyas Hüseynov AYNA.AZ-a açıqlamasında deyib.

Onun sözlərinə görə, görüşün baş tutmaması müharibənin müddətinin uzanmasına, neqativ proqnozların artmasına və diplomatik təşəbbüslərin səmərəsinin zəifləməsinə səbəb olur.