Tarixi yurd yerimiz olan Kəlbəcərdə həyat yenidən öz axarına düşür

Kəlbəcərə artıq ilk köç karvanı yol alıb. Uzun sürən ayrılıqdan, həsrətdən sonra kəlbəcərlilər böyük sevinc və qürur hissi ilə öz doğma yurd yerlərinə qovuşublar. Bu, əzəli-əbədi yurd yerimizdə, tarixi torpaqlarımızda həyat yenidən öz axarına düşür. Yenidən həyat qaynamağa başlayır.

Azərbaycan Prezidenti, Müzəffər Ali Baş Komandan cənab İlham Əliyev burada birinci yaşayış kompleksinin açılışını edərək, sakinlərə yaşayacaqları mənzillərin açarını təqdim edib.

Cənab İlham Əliyev Kəlbəcər sakinləri ilə görüşdə bu günün kəlbəcərlilərin həyatında tarixi bir gün olduğunu söyləyib. Onları 32 ildən sonra öz doğma yerlərinə qayıtmaları münasibəti ilə təbrik edib:” Biz ədaləti bərpa etdik, haqqımızı bərpa etdik və bugünkü tədbir bir daha onu göstərir ki, Azərbaycan xalqı iradəli xalqdır. Azərbaycan xalqı öz doğma torpağına bağlıdır və bütün çətinliklərə baxmayaraq, işğal dövründə biz nəinki inamımızı itirməmişik, hər birimiz - bütün xalq hər gün bu müqəddəs günü yaxınlaşdırırdı. Dövlət sizin üçün burada gözəl şərait yaradıb. Kəlbəcər şəhəri indi dünyanın ən gözəl mənzərəli şəhərlərindən birinə çevrilir.

Siz artıq birinci yaşayış kompleksində evlərlə təmin olunursunuz, amma inşaat işləri bununla bitmir. Bu gün təməlini qoyduğum növbəti yaşayış komplekslərində yaxın gələcəkdə sizin qohumlarınız, dostlarınız gəlib yerləşəcək. Birinci mərhələdə “Böyük Qayıdış” Proqramı çərçivəsində Kəlbəcər şəhərində dörd yaşayış kompleksinin inşası nəzərdə tutulur və bu binalarda 10 mindən çox insan yaşayacaq. Təbii ki, lazım olan bütün digər infrastruktur layihələri də icra edilibdir. İşıq, su, təbii qaz çəkilib, yollar salınıb, minalardan təmizləmə işi aparılıb. İndi Kəlbəcər şəhərində gözəl məktəb tikilir və gələn il istifadəyə veriləcək. Ancaq builki dərs ilini kəlbəcərli uşaqlar modul tipli məktəbdə oxuyacaqlar”.

Kəlbəcərin işğalı Azərbaycan xalqı üçün digər yaşayış məntəqələrimizin işğalı kimi böyük faciə idi. Çünki Kəlbəcərin işğalı çox böyük bir coğrafi ərazi üzrə Ermənistanla keçmiş “Dağlıq Qarabağ” arasında coğrafi bağlantı yaratmışdır və beləliklə, digər torpaqlarımızın işğalına yol açmışdır.

Kəlbəcər dağlar qoynunda yerləşir. Özü bir istehkamdır, bir qaladır Kəlbəcər. Bəs necə oldu ki, belə bir relyefi olan Kəlbəcər Azərbaycan əsgərinin diz çökdürəcəyi qorxaq erməni əsgərləri tərəfindən işğal edildi.

Azərbaycan Respublikasının Prezidenti cənab İlham Əliyev: “Kəlbəcərin 1993-cü il aprelin əvvəlində işğal altına düşməsi məhz ovaxtkı xəyanətkar rəhbərliyin bəd əməllərinin nəticəsi olmuşdur.

Ondan sonrakı dövrü hamımız yaxşı xatırlayırıq. Uzun sürən danışıqlar heç bir nəticə verməmişdi, verə də bilməzdi. Çünki birincisi, Ermənistan bir qarış torpaq qaytarmaq fikrində deyildi və danışıqlarda, sadəcə olaraq, görüntü yaratmaq naminə iştirak edirdi. Bu məsələ ilə məşğul olmalı olan üç ölkə - Fransa, Rusiya və Amerika məsələni həll etmək əvəzinə, münaqişəni dondurmaq istiqamətində işlər aparırdı və faktiki olaraq erməni işğalına hüquqi don geyindirmək üçün dəridən-qabıqdan çıxırdı. Məhz buna görə münaqişə sülh yolu ilə həll olunmadı. Bəzi ölkələr onlara milyardlarla dollar dəyərində pulsuz silahlar verirdi. İkinci Qarabağ müharibəsi və antiterror əməliyyatı nəticəsində məhv etdiyimiz və hərbi qənimət kimi götürdüyümüz Ermənistan ordusuna xaricdən verilən silahların qiyməti təqribən 5-6 milyard dollar dəyərindədir. Bütün bu silahlar onlara pulsuz verilirdi, bir məqsədlə ki, işğal davam etsin, bir məqsədlə ki, azərbaycanlılar heç vaxt öz dədə-baba torpaqlarına qayıtmasınlar, bir məqsədlə ki, Ermənistanla Azərbaycan arasında bu münaqişə sülh yolu ilə həll olunmasın.”

Azərbaycan dövləti və Azərbaycan xalqı bir yumruq kimi birləşərək cəmi 44 gün ərzində öz torpaqlarını erməni işğalçılarından təmizlədi. Ordumuz, igid əsgərlərimiz bu 44 gün ərzində yalnız ərazilərimizi təmizləyərək irəli gedirdilər. Erməni əsgərləri isə Azərbaycanın qəhrəman oğulları qarşısında tab gətirməyib silahı ataraq geri qaçırdılar. Ermənistan ordusunun özlərinin dediyinə görə bu müharibədə 12 min nəfər fərarisi olmuşdu.

Azərbaycan Respublikasının Prezidenti cənab İlham Əliyev: “Bizim üçün 2023-cü ilin 19-20 sentyabrı 8 noyabr qədər şərəfli və tarixi günlərdir. O vaxtdan bu yana Azərbaycan xalqı sülh şəraitində yaşayır və əminəm, bundan sonra da sülh şəraitində yaşayacaq. Dünya birliyi, beynəlxalq aləm bizim Qələbəmizi və yeni reallıqları tam qəbul etmişdir və bu da özlüyündə tarixi hadisədir.

Çünki sirr deyil ki, həm işğal dövründə, həm də müharibə dövründə Ermənistanı dəstəkləyən böyük dövlətlər bizə hər zaman böyük problemlər yaradırdı və yarada bilərdi. Bizim gücümüz, xalqımızın iqtidarla bir yerdə olması, hərbi Zəfərimiz, cəmiyyətdəki ovqat, vətənpərvərlik ruhu - bütün bu amillər bütün dünyaya göstərdi ki, hər kəs bizimlə hesablaşmalıdır və bizimlə hesablaşmayan nəticədə peşman olur. Bunu Ermənistan-Azərbaycan müharibəsi, Vətən müharibəsi, müharibədən sonrakı dövr göstərmişdir və bunu bugünkü reallıqlar da göstərir”.

Lakin erməni separatçıları bir vaxt işğal etdikləri şəhər və kəndləri viran qoymuş, evləri, məktəbləri, mədəniyyət ocaqları, dini etiqad yerlərimizi dağıtmış, meşələri yandırmış, qəbir daşlarını belə söküb aparmışlar. Kəlbəcərlilərə qarşı, Xocalılara qarşı qarşı soyqırım törətmişlər. Ermənilərin azərbaycanlılara qarşı etdikləri bu hərbi cinayətlər hafizəmizdən heç vaxt silinməyəcək.

Azərbaycan Prezidenti sakinlərlə görüşdə çıxışının sonunda demişdi ki, keçmişimizi heç vaxt unutmamalıyıq və ayıq olmalıyıq.

Əminəm ki, bütün bu amillər imkan verəcək ki, üstünlük hər zaman bizdə olsun. Bu gün bunu yenə də deyirəm, biz qalib xalq kimi bəyan edirik. Biz o pisliyi, vəhşiliyi unutmayacağıq. Ancaq biz bundan sonra heç kimlə müharibə aparmaq fikrində deyilik. Əgər bizə qarşı hər hansı bir təhlükə çıxarsa, onda yenə də bizim “dəmir yumruğ”umuzu hər kəs görəcək. Bu gün bu gözəl binaların ətrafında bizim görüşümüz də çox böyük rəmzi məna daşıyır. Onlar buranı dağıdıblar, biz isə qurub-yaratmışıq və sizi bu münasibətlə bir daha təbrik edirəm. Rahat yaşayın, sizə cansağlığı, xoşbəxtlik arzulayıram.

Məhərrəm İbadov
Abşeron rayon Ağsaqqallar Şurasının sədri

"DİA-AZ"