Neft Fondundan 317 minlik qəribə tender:

Dövlət Neft Fondu yeni tenderin nəticəsini açıqlayıb.

Tribunainfo.az xəbər verir ki, söhbət Fondun təmizlik xidmətlərinin satın almasından gedir.

Müsabiqənin nəticəsinə əsasən qalib “TƏMİZLİYİN İNCİSİ” MMC olub. Bbu məqsədlə ADNF şirkətə 317 min 658 manat pul ödəyəcək.

Açıq mənbələrdə qeyd edilir ki, Fond şirkətdən ödədiyi pulun müqabilində 200 ədəd yuyucu vasitə, 1000 ədəd süngər, 1000 ədəd təmizlik bezi, 6 ay müddətinə binanın fasadının təmizlənməsi, avtomobil salonu üçün 20 ədəd polirol (plastik, rezin və vinil səthlər üçün, xoş zərif qoxuya malik, hipoalerjenik, ləkə və tozun yenidən səthə çökməsinin qarşısını alan), 500 ədəd kağız dəsmal, 200 litr dezinfeksiya məhlulu, 2 ay müddətində alkopan və daş səthlərin təmizlənməsi, 10 ədəd avtomobillərin kontaktsız yuyulması üçün 200 litr həcmində vasitə, avtomobil şinləri üçün 55 litr həcmində qaraldıcı, 6 ay müddətində dezinseksiya və deratizasiya xidmətlərinin göstərilməsi, 12 ay müddətin təmizlik xidmətlərinin göstərilməsi və 200 ədəd və ya 100 lit qab yumaq üçün vasitə alacaq.

Bildirək ki, “Təmizliyin İncisi” MMC şirkətinin nizamnamə kapitalı 10 AZN təşkil edir və qanuni təmsilçisi Əvəz Qurbanov İsmayıl oğludur.

Bu şirkət təkcə, 2025-ci ildə 9 tenderin qalibi olub. Bu tenderlərdən biri Neft Fondunun keçirdiyi olub ki, barəsində yuxarıda qeyd etmişik. Yerdə qalan 8 tenderin hamısı ASAN Xidmətə aiddir. Xidmətin binalarının təmizlənməsini əhatə edən həmin tederlərin müqabilində şirkətə 6 milyon 424 min 556 manat ödənilib.

Maraqlıdır ki, “Təmizliyin İncisi” MMC 2024-cü ildə hər hansı tenderə qatılmayıb.