Ukraynada prezident seçkiləri: Zelenski taxtını qoruya biləcəkmi?
Dünən, 11:48
Ukraynada mümkün prezident seçkilərinə hazırlıq başlayıb, gözlənilən tarix 25 may 2025-ci ildir.
Reyting.az xəbər verir ki, bu barədə “The Economist” yazıb.
Britaniya nəşrinin təhlilində qeyd olunur:
Mənbələrin sözlərinə görə, artıq seçkilərə hazırlıq başlayıb, regional seçki qərargahları işə başlayıb, namizədlərin siyahıları tərtib edilir. Hazırkı prezident Vladimir Zelenskinin mümkün rəqiblərindən birinin nümayəndələri deyirlər ki, Ukraynanın seçkilərə ehtiyacı var, lakin dövlət başçısının ofisinin sərt reaksiyasından ehtiyat edərək, bu mövzuda ictimaiyyətə açıqlama verməkdən çəkinirlər.
“The Economist”-in nəzərdən keçirdiyi daxili sorğulara görə, Zelenski seçkidə məğlub olardı, çünki Rusiya işğalının başlamasından 3 il sonra cəmiyyət indiki dövlət başçısını artıq “müharibə qəhrəmanı” kimi qəbul etmir.
Əsas favorit Ukrayna Silahlı Qüvvələrinin keçmiş baş komandanı, ötən il Zelenski ilə münaqişədən sonra Böyük Britaniyaya səfir təyin edilmiş general Valeri Zalujnı hesab edilir.
Mənbənin sözlərinə görə, bir çoxları onu prezidentliyə namizəd olmağa çağırsalar da, Zalujnının siyasi ambisiyaları hələ də bəlli deyil.
Eyni zamanda, hazırkı səfir istisna olmaqla, digər müxalifət namizədlərindən daha çox insan Zelenskiyə səs verməyə hazırdır. Hazırkı prezidentin keçmiş həmkarı hesab edir ki, Zelenskinin verə biləcəyi ən yaxşı qərar istefa vermək və yalnız bir müddət prezident kimi qalacağına dair ilkin vədini yerinə yetirməkdir.
“Zelenskinin reputasiyasını qorumaq üçün yalnız bir çıxış yolu var. Bu, sizin iştirakınız olmadan seçki keçirmək və xalqı müharibədə birləşdirən şəxs kimi tarixə düşməkdir”.
Hələ sentyabrın sonunda məlumatlı mənbələr bildirib ki, Zelenski hakimiyyətini gücləndirmək üçün 2025-ci ildə prezident seçkilərinin keçirilməsi imkanını nəzərdən keçirir. Hazırda Zelenskinin seçkilərdəki potensial rəqibləri ilə bağlı çoxlu debatlar gedir.
Amerika Milli Demokratiya İnstitutunun məlumatına görə, ukraynalıların hazırkı prezidentə inamı 2023-cü ilin mayında 80 faizdən 2024-cü ildə 45 faizə düşüb. Bütövlükdə, hökumətə inam daha da azalıb. 3 dəfə prezidentliyə namizəd olmuş Ukraynanın keçmiş baş naziri Yuliya Timoşenko “The Economist”-ə deyib ki, siyasi proses artıq başlayıb.
Zelenskinin 5 illik səlahiyyət müddəti 2024-cü il mayın 20-də başa çatıb. Ukraynada prezident seçkiləri mart ayında keçirilməli olsa da, ölkədə hərbi vəziyyət hökm sürdüyü üçün keçirilmədi. Bundan əvvəl Zelenski ölkədə prezident seçkilərinin “vaxtında keçirilmədiyini” bildirmişdi. Onun fikrincə, bunlar yalnız Rusiyaya sərfəlidir. Eyni zamanda, o qeyd edib ki, hərbi münaqişə bitsəydi, ikinci prezidentlik müddətinə namizədliyini irəli sürməzdi.
Geri qayıt