Azərbaycan tarixinin ən böyük uğurlarından biri
5-11-2024, 08:30
2023-cü il noyabrın 8-də Xankəndidə keçirilən parad bir daha təsdiq
edir ki, Azərbaycanın bütün parametrləri dəqiq hesablamalara
əsaslanan uzun müddətli strategiyası var. Xankəndi şəhərində Vətən
müharibəsi Zəfərinin üçüncü il dönümünə həsr olunan hərbi parad
Azərbaycan dövlətinin möhkəm siyasi iradəsini, ordumuzun gücünü və
xalqımızın birliyini dünyaya bir daha nümayiş etdirdi.
2020-ci ildə Vətən müharibəsində qazanılmış qələbə və 2023-cü ildə
həyata keçirilmiş anti terror tədbirlərinin nəticələri 30 il davam edən işğala
son qoymaqla yeni bir tarixi mərhələnin başlanğıcı olub.
Vətən müharibəsində nəinki Ermənistan hakimiyyəti, eləcə də uzun bir
dövr ərzində işğal faktına etinasız qalan, Ermənistana qarşı sərt tədbirlər
görməkdən qaçan, əksinə, müxtəlif yollarla bu işğala bəraət qazandırmaq
istəyən dairələrə Azərbaycan xalqının öz ali məqsədlərindən geri
dönmədiyini göstərdi. Cənab Prezidentin də qeyd etdiyi kimi, 2020-ci ilin
noyabrında hərbi əməliyyatların dayandırılması şüurlu seçimidi. Məhz
Müzəffər Ali Baş Komandanın müdrikliyi, hadisələri dəqiq qiymətləndirmək
məharəti reallıqlara, dünyada və regionda gedən proseslərə adekvat qərar
qəbul edilməsinə imkan verdi. Keçən il noyabrın 8-də Xankəndidə keçirilən
parad bir daha təsdiq edir ki, Azərbaycanın düşünülmüş, bütün parametrləri
dəqiq hesablamalara əsaslanan uzun müddətli strategiyası var. Hesab
edirəm ki, bizim qələbələrimizin, əldə etdiyimiz nailiyyətlərin əsasında məhz
bu amil dayanır.
Azərbaycan ordusunun yüksək peşəkarlığı, əsgər və zabitlərin
vətənpərvərliyi, eləcə də xalqımızın həmrəyliyi 30 il davam edən işğala son
qoymağa imkan yaratdı. Bu 30 il ərzində biz bütün sahələrdə fəaliyyətimizi
məhz işğalda olan ərazilərin azad edilməsinə istiqamətləndirə bildik.
İqtisadi, siyasi, hərbi sahədə əldə olunmuş hər bir uğur bir amala xidmət
edirdi. Müzəffər Ali Baş Komandanın da qeyd etdiyi kimi, XXI əsrdə heç bir
ordu bizim qədər peşəkarlıq, fədakarlıq göstərməyib və heç bir xalq öz
doğma torpağını bu qədər əziz tutub uğrunda ölümə getməyə hazır
olmayıb. Vətən müharibəsində də, antiterror tədbirləri zamanında da
Azərbaycan ordusu yalnız legitim hərbi hədəflərə zərbə endirirdi. Mülki
infrastruktura və dinc sakinlərə zərər yetirilməməsi üçün maksimum diqqətli
və məsuliyyətli davrandı. Bu da bizim silahlı qüvvələrimizin peşəkarlığını və
Azərbaycan dövlətinin, xalqının humanist xarakterini əks etdirir.
Azərbaycan geosiyasi situasiyanın kifayət qədər mürəkkəb və
ziddiyyətli olduğu bir dövrdə zəfər qazanıb. Bu, bizim qələbəmizin
əhəmiyyətini və dəyərini artıran ən vacib məqamlardan biridir. Azərbaycan
xalqı məhz bu mənada tarixinin ən böyük uğurlarından birinə imza atıb.
Ağarəhim Baxışov – Dövlət İdarəçilik Akademiyası
"DİA-AZ"
Geri qayıt