ANCA-nın çarəsiz çırpıntısı: “Azərbaycan kabusu” dinclik vermir
23-08-2024, 10:47
Əcnəbi media xəbər verir ki, Amerika Erməni Milli Komitəsi (ANCA) Respublikaçılar Partiyasından ABŞ prezidentliyinə namizəd Donald Trampla açıq sövdələşməyə qərar verib. Komitə Bayden administrasiyasını “Artsaxa hücum edən Azərbaycan Prezidenti İlham Əliyevin soyqırımı rejiminə” göz yummaqda ittiham edib.
“Bu administrasiya Əliyev rejiminə Azərbaycanın sənədləşdirilmiş hərbi cinayətləri qarşısında cəzasızlıq presedenti yaratmağa imkan verdi”, - deyə ANCA iddia edir.
İndi Amerikanın erməni seçiciləri Tramp və onun yeni müttəfiqi Vansdan “Artsaxda azərbaycanlıların etnik təmizləməsini pisləyəcəklərini və Konqresin Azərbaycanı insanlığa qarşı cinayətlərinə görə məsuliyyətə cəlb etmək səylərini dəstəkləyəcəklərini” gözləyirlər.
Çox təəccüblüdür ki, Amerika ermənilərinin Bayden-Harris administrasiyası ilə bağlı heç bir şikayəti yox idi. Bu arada Ermənistanın və “Artsax”ın yuxulu Baydenin komandasından aldığı dividend yalnız yaşlı Nensi Pelosinin Tsitsernakaberddə axıtdığı göz yaşları olub. Hansı ki, 2023-cü ildə Azərbaycanın Qarabağı işğaldan azad etməsinə mane olmadı. Və Baydenin dövründə də Dövlət Departamenti ABŞ-ın Azərbaycana yardımına qoyulan məhdudiyyətləri Trampın dövründə olduğu kimi yayındırdı.
Hər iki rəqib düşərgə - həm Demokratlar, həm də Respublikaçılar - əslində Tramp və Bayden dövründə olduğu kimi, Erməni Komitəsinin səsinə məhəl qoymasa, ANCA nə edəcək? Bu ermənilər tam olaraq nəyə nail olmağa çalışırlar? ANCA konkret olaraq nəyə ümid edir? Azərbaycanın artıq öz ərazi bütövlüyünü bərpa etdiyini və bundan imtina etmək fikrində olmadığını, Ermənistanın isə Qarabağa hər hansı iddia irəli sürməyə nə hüquqi imkanının, nə də hərbi resursunun olduğunu nəzərə alsaq, bu hücumların hansısa effekti mümkündürmü?
AYNA mövzunu ekspertlərlə müzakirə edib.
Müstəqil siyasi şərhçi Nəsimi Məmmədli:
“Ermənistandan kənarda fəaliyyət göstərən erməni lobbi qruplarının əksəriyyəti Ermənistanla Azərbaycan arasında sülhün olmasını istəmir. ABŞ-da, xüsusən də Fransada güclü təsir imkanına malik erməni təşkilatları Azərbaycan əleyhinə və sülh əleyhinə daha fəal çıxış edir. Onların yüz ildən artıq fasiləsiz apardıqları ideoloji və hərbi-siyasi işlər iflasa uğrayıb. Nəinki bu lobbi qrupları, hətta Ermənistan və onun müttəfiqləri də regiondakı reallıqları dəyişdirə bilmir. Azərbaycan beynəlxalq hüquq normalarına uyğun olaraq öz ərazi bütövlüyünü və suverenliyini bərpa edib.
ABŞ hələ də Cənubi Qafqaza bütöv halda öz geosiyasi maraqlarının regionu kimi baxır. Eyni zamanda ABŞ Ermənistana Rusiyanı bu regiondan sıxışdırıb çıxarmağa qadir olan əsas dövlət kimi baxır və bu istiqamətdə müəyyən addımlar atır. ABŞ-dakı erməni təşkilatları da bu fürsətdən yararlanmaq istəyir.
Hazırda bu erməni təşkilatları ayrı-ayrı dövlətlərin əlində Azərbaycana təzyiq aləti kimi istifadə olunur. Onlar imkan daxilində, Azərbaycana beynəlxalq təzyiqlərin təşkilində rol oynayır. Onlar erməni xalqının və Ermənistan dövlətinin maraqlarına xidmət etmir.
Ermənistan hakimiyyəti də bu təşkilatlarla müəyyən məsafə saxlamağa çalışır. Nikol Paşinyan hökuməti başa düşür ki, Cənubi Qafqazda yeni münasibətlər sistemi sülh və əməkdaşlığa əsaslanacaq. Əgər regional layihələrdən və region dövlətləri ilə qarşılıqlı iqtisadi-ticarət əməkdaşlıqdan kənarda qalsa, bu, Ermənistan üçün ciddi problem yarada bilər. Rəsmi İrəvan Azərbaycanla münasibətləri gərginləşdirməyə yox, normallaşdırmağa meyllidir. Amerika Erməni Milli Komitəsi və bu kimi təşkilatlar heç bir nəticə əldə edə bilməyəcək”.
Politoloq Xəqani Cəfərli:
“Lobbiçiliyin ən çox yayıldığı ölkə ABŞ-dır. ABŞ, müəyyən mənada, lobbiçilik nəticəsində bir dövlət kimi meydana çıxdı. Məhz buna görə də digər ölkələrdən fərqli olaraq ABŞ-da lobbi təşkilatları prestijli biznes hesab olunur.
Amerika Erməni Milli Komitəsi bunu bilir və bundan istifadə etməyə çalışır. Onlar bir çox hallarda təmsil etdikləri cəmiyyətin mənafeyindən öz maraqlarını həyata keçirmək üçün istifadə edirlər. Bundan əlavə, təmsil etdikləri icmanın dəstəyini itirməmək üçün Amerika Erməni Milli Komitəsi ABŞ seçkiləri öncəsi fəal iş aparır.
İndi seçki dövrüdür və Amerika Erməni Milli Komitəsinin ermənilər arasında təsiri çox aşağıdır. Ona görə də onlar indi fəal olmağa, ermənilərin rəğbətini qazanmağa çalışırlar. Lakin heç bir lobbiçilik xalqın iradəsi ilə qurulan nizamı dəyişdirə bilməz. Ermənistanın Qarabağda qüvvələr nisbətini dəyişmək imkanı yoxdur”.
Geri qayıt