"Məhbusların şikayətinə dərindən baxılmalıdır"
15-06-2024, 12:37
Bakının 4 saylı Cəzaçəkmə Müəssisəsində məhbus qadınlara şirniyyat bişirtdirilərək "Azcake" mağazalarında satışa çıxarılması, əməklərinin qarşılığında isə onlara heç bir məvacib ödənilmədiyi iddia olunur.
Milli Məclisin İnsan hüquqları komitəsinin sədr müavini Tahir Kərimli Pravda.az-a açıqlamasında deyib ki, həqiqətən belə bir hal varsa, əlbəttə, məhbuslara əməkhaqqı verilməlidir.
“Xatırlayıram, 1992-ci ildə ABŞ-də cəzaçəkmə müəssisəsi ilə tanış olanda gördüm ki, orada, təxminən, mülki - azad həyatda işləyənlərin 30%-i qədər əməkhaqqı verilən sahələr yaradılmışdı. Məhbuslar işləyirdilər, 30% miqdarında əməkhaqqı alırdılar. Ümumiyyətlə, əməyin qarşılığı ödənilməyən heç bir iş ola bilməz. Harada olmasından asılı olmayaraq. Hətta hərbi xidmətdə olsa belə, mütləq əməyin qarşılığı ödənilməlidir. Çünki onun ekvivalenti, dəyəri ifadə olunmalıdır. Başqa cür mümkün deyil. Deyirlər ki, Milli Məclisin İnsan hüquqları komitəsinin 4 saylı Cəzaçəkmə Müəssisəsi ilə bağlı şikayətdən xəbəri var. Şəxsən mənim belə bir məsələdən xəbərim yoxdur. Amma buna "qanunsuzdur" deyə bilmərəm. Ola bilər, məhbuslarla müqavilə bağlayıblar. Məhbuslar faydalı işlə məşğul olsunlar, eyni zamanda mülki həyatdakı qədər olmasa da, müəyyən miqdarda əməkhaqqı alsınlar. Hətta dəfələrlə çıxış etmişəm ki, bu, lazımdır. Məsələn, dülgərlik işi, şirniyyatların bişirilməsi və s. Məhbusların şikayətinə dərindən baxılmalıdır. Məsələ ilə bağlı müəyyən müzakirə apararam”, - deputat bildirib.
Qeyd: 4 saylı Cəzaçəkmə Müəssisəsində məhbus qadınların əməyinin istismar edilməsi barədə iddialarla bağlı Penitensiar Xidmətə Pravda.az saytı tərəfindən sorğu ünvanlanıb. İyunun 14-də ünvanlanan sorğuya hələ də cavab verilməyib.
Geri qayıt